നഴ്സ് സമരം: രോഗശാന്തി നല്‍കുന്ന ധ്യാനഗുരുക്കന്‍മാരെ ആശുപത്രിയില്‍ നിയമിച്ചുകൂടേ?

സഭ ആശുപത്രികള്‍ നടത്തുന്നത് നഴ്‌സുമാര്‍ക്കും ഡോക്ടര്‍മാര്‍ക്കും ഉപജീവനം നടത്താന്‍ മാത്രമാണ്. അല്ലാതെ ധ്യാനഗുരുക്കന്‍മാരായ വൈദികര്‍ക്ക് രോഗശാന്തി നല്‍കാന്‍ അറിയാഞ്ഞിട്ടല്ല. മധ്യപ്രദേശില്‍ ജ്യോതിഷികളെ നിയമിച്ചതുപോലെ നഴ്‌സുമാര്‍ സമരം തുടരുന്നതിനാല്‍ ആശുപത്രികളില്‍ അടിയന്തരമായി രോഗശാന്തി വിദഗ്ധരായ വൈദികരെ നിയമിച്ച് പ്രശ്‌നം പരിഹരിക്കാവുന്നതാണ്-നാരദാ ന്യൂസ് സീനിയര്‍ സബ് എഡിറ്റര്‍ ജിനേഷ് ദേവസ്യ എഴുതുന്നു.

നഴ്സ് സമരം: രോഗശാന്തി നല്‍കുന്ന ധ്യാനഗുരുക്കന്‍മാരെ ആശുപത്രിയില്‍ നിയമിച്ചുകൂടേ?

ജ്യോതിഷ വിദഗ്ധരും കൈനോട്ട വിദഗ്ധരും മഷിനോട്ട വിദഗ്ധരും വാസ്തുവിദഗ്ധരും മറ്റും മധ്യപ്രദേശിലെ ആശുപത്രികളില്‍ രോഗികളെ ചികിത്സിക്കാനായി സേവനമേറ്റെടുക്കുന്ന വിവരം അറിഞ്ഞു കാണുമല്ലോ. ഇതേസമയം കേരളത്തില്‍ നഴ്‌സുമാര്‍ ശമ്പളക്കൂടുതല്‍ ചോദിച്ച് സമരം ചെയ്തുവരികയാണ്. ജ്യോതിഷിമാരെയും മറ്റും ആശുപത്രികളില്‍ നിയമിച്ച തീരുമാനത്തെ മുക്തകണ്ഠം പ്രശംസിച്ചുകൊണ്ടു പറയട്ടെ കേരളത്തിലെ നഴ്‌സിംഗ് സമരത്തെ നേരിടാന്‍ സമാനമായ നടപടികള്‍ ആരംഭിക്കാന്‍ സംസ്ഥാന സര്‍ക്കാര്‍ വൈകിക്കൂട. ജ്യോതിഷം, മഷിനോട്ടം, കൈനോട്ടം, തത്തയെക്കൊണ്ട് കാര്‍ഡ് എടുപ്പിക്കല്‍ തുടങ്ങിയ ഇന്ത്യയുടെ തനത് ഭാവിപ്രവചന രീതികള്‍ ഉപയോഗിക്കാനുള്ള ചികിത്സയിലൂടെ ആരോഗ്യരംഗത്തെ അനധികൃത ചൂഷണങ്ങള്‍ തടയാന്‍ കഴിയും എന്നതിനാലാണ് മധ്യപ്രദേശ് സര്‍ക്കാര്‍ പ്രശംസയര്‍ഹിക്കുന്നത്.

വിദഗ്ധരായ കൈനോട്ടക്കാരും മഷിനോട്ടക്കാരുമൊക്കെ രോഗങ്ങള്‍ കണ്ടെത്താനും ചികിത്സിക്കാനും വന്നാല്‍ ഇപ്പോഴത്തെ ചൂഷകരായ ഡോക്ടര്‍മാര്‍ക്ക് ജോലിയില്ലാതെ വീട്ടിലിരിക്കേണ്ട അവസ്ഥയാകും സംജാതമാകുന്നത്. കേരളത്തിലെ ആശുപത്രികളില്‍ വലിയൊരു പങ്കും കത്തോലിക്കാ സഭയുടെ ഉടമസ്ഥതയിലാണല്ലോ. സഭയില്‍ ദൈവതുല്യരായ ധ്യാനഗുരുക്കന്‍മാരുള്ളതും നമുക്കറിയാം. വരട്ടുചൊറി മുതല്‍ ക്യാന്‍സര്‍ വരെ സൗജന്യമായി ഭേദമാക്കുന്നതിനായി ജീവിതം ഉഴിഞ്ഞുവെച്ചവരാണ് ഈ ദൈവതുല്യര്‍. എന്നാല്‍ ഏത് വലിയ ഡോക്ടര്‍മാരും കിണഞ്ഞുപരിശ്രമിച്ചിട്ടും പല രോഗികളും ഇവിടെ മരിക്കുന്നത് നമുക്കറിയാം. സഭ ആശുപത്രികള്‍ നടത്തുന്നതു തന്നെ പാവപ്പെട്ട ഡോക്ടര്‍മാര്‍ക്കും നഴ്‌സുമാര്‍ക്കും മറ്റ് ജീവനക്കാര്‍ക്കും ജോലി കൊടുക്കുന്നതിനാണ്. വേണമെങ്കില്‍ പ്രമുഖരായ ധ്യാനഗുരുക്കളെ ഉപയോഗിച്ച് നിസാരമായി രോഗികളെ സുഖപ്പെടുത്താവുന്നിടത്താണ് കുറേപ്പേര്‍ക്ക് ജോലി കൊടുക്കുന്നതിനായി സഭ ആശുപത്രികള്‍ നടത്തുന്നത്. അത്തരമൊരു സാഹചര്യത്തില്‍ ശമ്പളക്കൂടുതല്‍ ആവശ്യപ്പെട്ട് നഴ്‌സുമാര്‍ നടത്തുന്ന സമരത്തെ അംഗീകരിക്കാനാവില്ല.

മധ്യപ്രദേശിന്റെ മാതൃകയില്‍ ഡോക്ടര്‍മാര്‍ക്കും നഴ്‌സുമാര്‍ക്കും പകരം ആശുപത്രികളില്‍ അടിയന്തരമായി ധ്യാനഗുരുക്കന്‍മാരെ നിയമിക്കാന്‍ സഭ മുന്നിട്ടിറങ്ങണം. ഡോ. രാജേന്ദ്രന്‍ നായര്‍, ഡോ. ജോസ് വലിയപറമ്പില്‍, ഡോ. മുംതാസ് ബീഗം എന്നിങ്ങനെയുള്ള ബോര്‍ഡുകള്‍ക്ക് പകരം ഫാ. മാത്യു നായ്ക്കംപറമ്പില്‍, ഫാ. മാത്യു ആശാരിപ്പറമ്പില്‍, ഫാ. സേവ്യര്‍ഖാന്‍ വട്ടയില്‍ എന്നിങ്ങനെ ബോര്‍ഡുകള്‍ വെച്ച് അവരെക്കൊണ്ട് നിസാരമായി രോഗികളെ സുഖപ്പെടുത്തി കാണിക്കാന്‍ സഭ മുന്നിട്ടിറങ്ങണം. ഇത്തരത്തില്‍ ചെയ്യാന്‍ തയ്യാറായാല്‍ നഴ്‌സുമാര്‍ സമരം നിര്‍ത്തി വേറെ ജോലിക്ക് പോകേണ്ടി വരുമെന്നതാണ് വാസ്തവം. ഇത്തരമൊരു നടപടിയാണ് അഹങ്കാരികളായ നഴ്‌സുമാരെ ഒരു പാഠം പഠിപ്പിക്കാനായി ചെയ്യേണ്ടത്. ചീട്ടെടുത്ത് വരുന്ന രോഗികളെ ആ നിമിഷം തന്നെ പൂര്‍ണമായി സുഖപ്പെടുത്താന്‍ ധ്യാനഗുരുക്കന്‍മാര്‍ക്ക് കഴിയുന്നതുകൊണ്ട് അനാവശ്യമായ പരിശോധനകളോ മരുന്നുകഴിക്കലോ ആവശ്യം വരില്ല. മാത്രമല്ല, ചികിത്സ ദൈവികമായതിനാല്‍ 100 ശതമാനം രോഗികള്‍ക്കും രോഗശാന്തി ഉറപ്പാണെന്ന പ്രത്യേകതയുമുണ്ട്.

ഇത്തരത്തില്‍ രോഗികളെ പിഴിയുന്ന നിലവിലെ ചികിത്സാരീതിയെ ഉടച്ചുവാര്‍ക്കാനും കൂടി കഴിയുന്നതിനാല്‍ ധ്യാനഗുരുക്കന്‍മാരായ വൈദികരെ ആശുപത്രിയില്‍ നിയമിക്കാന്‍ വൈകിക്കൂട. മധ്യപ്രദേശിലെ പുതിയ ചികിത്സാരീതിയെക്കുറിച്ച് അറിഞ്ഞാല്‍ മാത്രമേ കേരളത്തില്‍ ധ്യാനഗുരുക്കന്‍മാരെ നിയമിക്കുന്ന നടപടി എങ്ങനെ ഫലപ്രദമാകുമെന്ന് മനസിലാകൂ. മധ്യപ്രദേശില്‍ മുന്‍കാലങ്ങളില്‍ നിന്ന് വ്യത്യസ്തമായി ചീട്ടെടുക്കുന്ന രോഗികള്‍ ഇനി നേരെ പോകുക കൈനോട്ട വിദഗ്ധര്‍, മഷിനോട്ട വിദഗ്ധര്‍, തത്തയെക്കൊണ്ട് കാര്‍ഡ് എടുപ്പിക്കല്‍ വിദഗ്ധര്‍, വാസ്തുവിദഗ്ധര്‍ എന്നിവരുടെ അടുത്തേക്കാകും.

ഡോക്ടര്‍മാര്‍ രോഗം വന്നശേഷം മാത്രം ചികിത്സിക്കുന്നിടത്ത് ഈ വിദഗ്ധര്‍ രോഗം വരുന്നതിന് മുമ്പ് ഇവരുടെ അഭൗമസിദ്ധികള്‍ ഉപയോഗിച്ച് ആ വിവരം മനസിലാക്കുകയും പരിഹാരം ചെയ്യുകയും ചെയ്യും. ശരിയായ വാസ്തുശാസ്ത്രം നോക്കാതെ വീട് വെച്ചതുകൊണ്ടു മാത്രം ക്യാന്‍സര്‍ ബാധിക്കുന്ന ധാരാളം സംഭവങ്ങള്‍ നമ്മുടെ നാട്ടിലുണ്ടാകാറുണ്ടല്ലോ. ഇത്തരത്തിലുള്ള രോഗികളെ വാസ്തുവിദഗ്ധര്‍ (വാസ്തുഡോക്ടര്‍മാര്‍) പരിശോധിച്ച് പരിഹാരം നിര്‍ദ്ദേശിക്കുന്നതിലൂടെ ക്യാന്‍സര്‍ ഇല്ലാതാക്കാനാവും. ഗുരുതരമായ ക്യാന്‍സറുകള്‍ പോലും വീടിന്റെ നിര്‍മാണത്തില്‍ ചെറിയൊരു മാറ്റം വരുത്തിയോ കൂട്ടിച്ചേര്‍ക്കല്‍ വരുത്തിയോ മാറ്റാനാവും. ഇത്തരത്തില്‍ത്തന്നെ മഷിനോട്ട വിദഗ്ധര്‍ക്കും കൈനോട്ട വിദഗ്ധര്‍ക്കും തത്തയെക്കൊണ്ട് കാര്‍ഡെടുക്കല്‍ വിദഗ്ധര്‍ക്കും തങ്ങളുടെ ഭാവി പ്രവചിക്കാനുള്ള കഴിവ് ഉപയോഗിച്ച് രോഗം വരുന്നതിന് മുമ്പ് അത് കണ്ടെത്തി പ്രതിവിധി നിര്‍ദ്ദേശിക്കാനാകും.

ആരോഗ്യരംഗത്ത് നിലനില്‍ക്കുന്ന ചൂഷണത്തിന് പൂര്‍ണമായ പരിഹാരം എന്ന നിലയിലും ചെലവുകുറഞ്ഞതും 100 ശതമാനം ഫലം നല്‍കുന്നതുമായ ചികിത്സയാണ് രോഗശാന്തി ശുശ്രൂഷയും മഷിനോട്ടവും മറ്റും. നമ്മുടെ രാജ്യത്ത് ഇത്രയധികം ധ്യാനഗുരുക്കന്‍മാരും ആത്മീയതയും സൗജന്യമായി ലഭിക്കുമ്പോള്‍ അവ ഉപയോഗിക്കുകയെന്നതാണ് ശാസ്ത്രബോധവും പരിഷ്‌കരണ സ്വഭാവവുമുള്ള ഭരണകൂടങ്ങളും ആത്മീയ നേതൃത്വവും അടിയന്തരമായി ചെയ്യേണ്ടത്.

Read More >>