വെറുതെ എനിക്ക് ടച്ചിങ്സാകരുതെന്ന് ബാലമംഗളത്തിലെ ഡിങ്കന്‍ മംഗളം ചാനലിനോട് അരുള്‍ ചെയ്യുന്നു!

ഫോണ്‍ മനുഷ്യകുലത്തിന് താന്‍ നല്‍കിയത് രതിയിലേര്‍പ്പെടാനാണെന്നും തന്റെ സൃഷ്ടികളായ റിപ്പോര്‍ട്ടേഴ്സിനെ കക്കൂസിലും ബാത്ത്റൂമിലും ഒളിപ്പിച്ചു നിര്‍ത്തി ജീവഹാനി വരുത്തരുതെന്നും- സീനിയർ സബ് എഡിറ്റർ ജിനേഷ് ദേവസ്യ വഴി ഡിങ്കന്‍ അരുള്‍ ചെയ്യുന്നു ;)

വെറുതെ എനിക്ക് ടച്ചിങ്സാകരുതെന്ന് ബാലമംഗളത്തിലെ ഡിങ്കന്‍ മംഗളം ചാനലിനോട് അരുള്‍ ചെയ്യുന്നു!

.'ചിലരെ ഞാന്‍ കുരുവുമായി സൃഷ്ടിക്കും. അവരത് പൊട്ടിച്ചുകൊണ്ടേയിരിക്കും' - (ഡിങ്കന്റെ തിരുവെഴുത്തുകളില്‍ നിന്ന് )പൂച്ചക്കൂട്ടി, എന്റെ ചക്കരെ എന്നൊക്കെ ഒരു മന്ത്രി കാമുകിയെ വിളിച്ചത് ഒളിഞ്ഞു നിന്നു കേട്ടതു പോരാ വാര്‍ത്തയാക്കിയ മംഗളത്തെ ചൊറിഞ്ഞ് അതിന്റെ മറവില്‍ പുണ്യഗ്രന്ഥമായ ബാലമംഗളത്തെ ചൊറിയുന്നവരെ നോക്കി സത്യദൈവമായ ഡിങ്കന് മിണ്ടാതിരിക്കാനാകില്ല. അകത്തിടുന്ന ഷഡ്ഢിയെടുത്ത് പുറത്തെടുത്ത് സദാചാരവാരികളുടെ കുരു പൊട്ടിച്ച സത്യദൈവമാണ് ഡിങ്കന്‍.


മംഗളം എന്ന പേരില്‍ വരുന്നവയില്‍ ബാലമംഗളം ഒഴികെ മറ്റൊന്നും എന്നില്‍ പെട്ടതല്ലെന്ന് സത്യദൈവമായ ഡിങ്കന്‍ ഡിങ്കന്റെ പ്രവാചകനായ എനിക്ക് ദര്‍ശനം തന്നിരിക്കുന്നു. മന്ത്രിയെ ചൊറിയുന്നവരും ആണും പെണ്ണും ഒരുമിച്ചിരുന്നാല്‍ കുരു പൊട്ടുന്നവരും ഡിങ്കന്റെയും ബാലമംഗളത്തിന്റെയും മഹത്വം അറിയാത്ത പോഴന്‍മാരാണ്. എന്റെ വാക്കുകളെ അതേപടി കൊണ്ടാല്‍ ഞാന്‍ നിങ്ങളെ സ്വര്‍ഗ്ഗത്തില്‍ ഇരുത്തുമെന്നും അമൃതില്‍ കുളിപ്പിക്കുമെന്നും അന്‍പത്തിയൊന്നു സുന്ദരിമാരെ നല്‍കുമെന്നും ( ലക്കം 16 പേജ് 14) ഞാന്‍ നിങ്ങളോട് അരുളി ചെയ്തിട്ടുള്ളതാണ്. പിന്നെ എന്തിനാണു കുഞ്ഞുങ്ങളെ ഈ ലോകത്തില്‍ നിങ്ങള്‍ കുരു പൊട്ടി ചാകുന്നത്.

കുരുപൊട്ടിക്കുന്നതില്‍ മുന്‍പന്തിയിലുള്ള ശിവസേനക്കാരെയും ദോശ ചുടുന്ന പോലെ ഞാന്‍ തന്നെയാണ് ചുട്ടെടുത്തത്. മന്ത്രിക്കും എക്സ്ട്രാ ഫിറ്റിങ്ങ് ഒന്നും ഞാന്‍ കൊടുത്തിരുന്നില്ല. മന്ത്രിക്കും ഫോണില്‍ സെക്സ് സംസാരിക്കുന്നതിനും സ്വയംഭോഗം ചെയ്യുന്നതിനും ജാതകം നോക്കേണ്ട കാര്യമില്ലെന്ന് സത്യദൈവമായ ഞാന്‍ അരുളി ചെയ്യുന്നു. മന്ത്രി ജോലി ചെയ്യുന്നുണ്ടോയെന്ന് കുഞ്ഞാടുകളായ നിങ്ങള്‍ നോക്കേണ്ടതാണ്. തുണി ഉരിയുന്നുണ്ടോ കക്കൂസില്‍ പോകുന്നുണ്ടോയെന്നൊക്കെ നോക്കി നടക്കുന്നത് ദീനിബോധമുള്ള വിശ്വാസികള്‍ക്ക് ചേരുന്നതല്ലെന്ന് പങ്കിലക്കാട്ടിലെ സത്യദൈവം അരുളി ചെയ്യുന്നു. ലോകത്തെ ജനങ്ങള്‍ തെറ്റു ചെയ്യുന്നുണ്ടെങ്കില്‍ എടുത്താല്‍ പൊങ്ങാത്ത ഇരുമ്പ് ഉലക്കയും ജെട്ടിയുമായി ഞാന്‍ കാവല്‍ നില്‍ക്കുന്ന കാര്യം മറന്നു നിങ്ങള്‍ വിധിയാളാകുന്നത് ഏകദൈവമായ എന്നെ അധിക്ഷേപിക്കുന്നതിന് തുല്യമാണ്. ഫോണില്‍ തുണ്ട് പറയാത്തവര്‍ ആരെങ്കിലും നിങ്ങളുടെ ഇടയില്‍ ഉണ്ടെങ്കില്‍ മാത്രം അവര്‍ ശശീന്ദ്രന് കല്ലെറിയട്ടെ. ഞാന്‍ കരുണാമയനും ഫോണില്‍ തുണ്ട് പറയുന്നവരോട് നിരുപാധികം ക്ഷമിക്കുന്നവനുമാണെന്ന് അല്‍പ്പ വിശ്വാസികളായ നിങ്ങള്‍ക്കു അറിഞ്ഞു കൂടെ. അതിന് വേണ്ടിയാണ് ഞാന്‍ ഫോണ്‍ സൃഷ്ടിച്ചതുതന്നെ.


മാധ്യമപ്രവര്‍ത്തകരെ.... ഒളിഞ്ഞു നോക്കാനും ഇക്കിളി കൂട്ടാനുമല്ല വികസനത്തിനും ജനങ്ങളുടെ നന്‍മയ്ക്കു വേണ്ടി പ്രവര്‍ത്തിക്കുവാനും ആണ് നിങ്ങള്‍ ഈ ജോലി ഏറ്റെടുത്തിരിക്കുന്നുവെന്ന കാര്യം മറക്കരുത്. മറിച്ചായാല്‍ നരകത്തിലെ വറചട്ടിയില്‍ കിടന്നു വെന്തുരുകാനാകും നിങ്ങളുടെ വിധി. വെറുതെ ഞാന്‍ അടിക്കുന്ന കള്ളിന് ടച്ചിങ്സ് ആകരുത് പറഞ്ഞേക്കാം.... എന്നിരുന്നാലും എന്റെ തിരുവെഴുത്ത് പൂര്‍ത്തിയാക്കാന്‍ വേണ്ടിയാണ് നിങ്ങളില്‍ ചിലര്‍ കുരുപൊട്ടിച്ച് ജീവിക്കുന്നവരായി സൃഷ്ടിച്ചതെന്ന് എനിക്ക് അറിയാവുന്നതു കൊണ്ട് കൂടുതല്‍ ഒന്നും ഞാന്‍ പറയുന്നില്ല. മംഗളം ചാനലുകാരെ നിങ്ങള്‍ ഇത്തരം വാര്‍ത്തകള്‍ തുടരെ തുടരെ കൊടുത്ത് വിശ്വാസികളുടെ കുരു ഒറ്റയടിക്ക് പൊട്ടിക്കരുത്. കുളിക്കടവിലും കുളിമുറിയിലും ഒളിച്ചു നിര്‍ത്തി പാവപ്പെട്ട റിപ്പോര്‍ട്ടേഴ്സിനെ നിങ്ങള്‍ കൊലയ്ക്ക് കൊടുക്കരുത്. അവരും എന്റെ സൃഷ്ടികളാണ്.

ലേഖനം എന്ന പേരില്‍ സദാചാരം കടത്തുന്ന കടല്‍കിഴവന്‍മാരെയും സത്യദൈവമായ ഞാന്‍ വെറുതെ വിടില്ലെന്നും ഞാന്‍ അരുളിചെയ്യുന്നു. ആകാശത്ത് ഡിങ്കനെ കണ്ടുവെന്നും മീനിന്റെ മുകളില്‍ മാഷാ ഡിങ്കാ എന്ന എഴുത്ത് കണ്ടുവെന്ന് പറയുന്നവരും സദാചാര പ്രശ്നത്തെ അതിജീവിച്ചവരാണ്. ആ ലെവലില്‍ നിങ്ങള്‍ എത്തുമ്പോള്‍ ആണും പെണ്ണും ഒരുമിച്ചിരിക്കുന്നതും കിടക്കുന്നതും കണ്ടാലും ഒളിഞ്ഞു നോക്കാന്‍ നിങ്ങള്‍ക്കു തോന്നുകയില്ല.

ഹെയര്‍ സ്റ്റെല്‍ കേടാവാതിരിക്കാന്‍ ഹെല്‍മെറ്റ് വെക്കാതിരുന്നാല്‍ ചില്ലിട്ട ഫോട്ടോയില്‍ നല്ല ഭംഗിയുണ്ടാകുമെന്ന എന്റെ തിരുവചനം അക്ഷരാര്‍ത്ഥത്തില്‍ അനുസരിച്ച നിങ്ങള്‍ ഈ തിരുവെഴുത്തും പാലിക്കണം. അല്ലെങ്കില്‍ വറചട്ടിയുമായി ഞാന്‍ നിങ്ങളുടെ അടുത്തുതന്നെയുണ്ടെന്ന കാര്യം മറക്കരുത്. യദാ യദാ ഹി ഡിങ്കസ്യ ഗ്ലാനിര്‍ ഭവതി ഭാരത: അഭ്യുത്ഥാനമഡിങ്കസ്യ തദാത്മാനം സൃജാമ്യഹം പരിത്രാണായ സാധൂനാം വിനാശായ ച ദുഷ്‌കൃതാം ഡിങ്ക സംസ്ഥാപനാര്‍ഥായ ഡിങ്കസ്വാമി യുഗേ യുഗേ എന്നാണല്ലോ നല്ലതു വരട്ടെ

Read More >>