തേങ്ങാവെള്ളത്തിൽ ചീന്തിയ കപ്പമുക്കിയ കുർബ്ബാനയും 24 വാറ്റു കേന്ദ്രങ്ങളും

വൈനെന്ന പേരിലാണ് കത്തോലിക്കാ സഭ മുന്തിരി വാറ്റി കുർബ്ബാന മധ്യേ ഉപയോ​ഗിക്കുന്നത്. പാരമ്പര്യത്തെ മുറുകെ പിടിക്കുന്ന സുറിയാനി സഭയ്ക്ക് ബലിയർപ്പണത്തിന് പഴയ മാർ​​ഗ്​ഗത്തിലേയ്ക്ക്, കപ്പയിലേയ്ക്കും തേങ്ങാവെള്ളത്തിലേയ്ക്കും തിരികെ പോയി മാതൃക കാണിക്കാവുന്നതാണ്- മദ്യനിരോധനത്തിന് വാദിക്കുന്ന സഭയുടെ കേരളത്തിലെ കുടിക്കഥ നാരദ ന്യൂസ് സബ് എഡിറ്റർ ലിയോനാൾഡ് ഡെയ്സി മാത്യു എഴുതുന്നു.

തേങ്ങാവെള്ളത്തിൽ ചീന്തിയ കപ്പമുക്കിയ കുർബ്ബാനയും 24 വാറ്റു കേന്ദ്രങ്ങളും

യുഡിഎഫ് സ‍ർക്കാർ മദ്യനയം അവതരിപ്പിച്ചകാലം. കേരളത്തിലെ കത്തോലിക്കാ സഭ അങ്കം ജയിച്ചമാതിരി സന്തോഷത്തിലാണ്. കേരളത്തിലെ കുടിയന്മാരെ മാനസാന്തരപ്പെടുത്തിയിട്ടേ ബാക്കി പണിയുള്ളൂവെന്ന് തീരുമാനിച്ചിറങ്ങിയതാണല്ലോ അവർ.

കേരളത്തിലെ ബിവറേജസ് ഔട്ലെറ്റുകളും ബാറുകളും ബിയ‍‍ർ & വൈൻ പാ‍‍ർലറുകളും സർക്കാർ ഘട്ടം ഘട്ടമായി പൂട്ടിടുമെന്ന മനോരാജ്യത്തിൽ മുഴുകിയിരിക്കെയാണ് ബനഡിക്ട് പതിനാറാമൻ മാർപ്പാപ്പ മദ്യപിക്കുന്നതിന്റെ ചിത്രം പുറത്തുവന്നത്. പോപ്പിനു കുടിക്കാമെങ്കിൽ ഞങ്ങൾക്ക് കുടിച്ചാലെന്താ അച്ചോയെന്നു ചോദിച്ച വിശ്വാസികളോട് തണുപ്പുരാജ്യങ്ങളിൽ മദ്യപാനമൊക്കെ സ്വാഭാവികമല്ലേയെന്നായിരുന്നു വൈദികരുടെ മറുപടി. അതായത് കേരളസഭയ മാരക പാപമായി കരുതുന്ന മദ്യപാനം ഇറ്റലിയിലെത്തിയപ്പോഴേയ്ക്ക് വീര്യം ചോർന്ന് പാപമല്ലാതായി മാറുന്നുവെന്നാണ് അതിന്റെ ധ്വനി.

അടുത്ത കാലത്ത് ആലപ്പുഴയിലുള്ളൊരു പള്ളിയിൽ പോയി. രാത്രി അത്താഴശേഷം വികാരിയച്ചൻ മേശപ്പുറത്ത് രണ്ടുകുപ്പി വീഞ്ഞെടുത്തുവെച്ചു. രണ്ടെണ്ണം കഴിച്ചിട്ട് ഉറങ്ങാൻ നല്ല സുഖമായിരിക്കുമെന്നും പറഞ്ഞ് വികാരിയച്ചനോടൊപ്പം ഞാനും കുടിച്ചു. ഇത് ആലപ്പുഴയിലെ കാര്യം. നേരെ വടക്കോട്ട് ചെന്നാൽ കാര്യം മാറി. മദ്യപാനം മാരകപാപമാണെന്നുംപറഞ്ഞ് വിശ്വാസികളെ തെരുവിലിറക്കുന്ന വൈദികരെയാണ് അവിടെ കാണുക. അവിടെ മദ്യാപാനം മാരകപാപമാണ്.

സുറിയാനി കത്തോലിക്കർ അരമായ ഭാഷയിൽ കുർബ്ബാന ചൊല്ലിയിരുന്നകാലം. പോർച്ച്​ഗീസുകാർ വരുന്നേനും മുമ്പാണ്. ഓലമേഞ്ഞ കൂരയ്ക്കുള്ളിൽ വിശ്വാസികളും കാർമ്മികനും ഒത്തുചേർന്ന് കുർബ്ബാന അർപ്പിച്ചിരുന്നു. അന്ന് കപ്പനേരിയതായി അരിഞ്ഞത് ഉണക്കിയതും തേങ്ങാവെള്ളവുമാണ് കുർബ്ബാനയ്ക്കായി ഉപയോ​ഗിച്ചുകൊണ്ടിരുന്നത്. പോർച്ച്​ഗീസുകാരുടെ വരവോടെ സുറിയാനി കത്തോലിക്കരുടെ സംസ്ക്കാരം അപ്പാടെ മാറ്റിമറിയ്ക്കപ്പെട്ടു. അവിടെ തുടങ്ങുന്നു കേരള സഭയുടെ വൈനുപഭോ​ഗം. ഏതായാലും തേങ്ങാവെള്ളത്തിനു പകരം വൈൻ ഉപയോ​ഗിച്ചുതുടങ്ങിയ കേരള സഭയ്ക്ക് 24 വാറ്റുകേന്ദ്രങ്ങളുമുണ്ട്.

ഭൂമിക്കടിയിലുള്ള കെല്ലർ എന്ന കേന്ദ്രത്തിലാണ് വൈൻ ഉൽപ്പാദനം നടക്കാറ്. കേരളത്തിലെ സഭകൾക്കും അത്തരം കേന്ദ്രങ്ങളുണ്ട്. വൈദികർ മൂക്കുമുട്ടെ കുടിക്കാനുപയോ​ഗിക്കുന്ന മുന്തിരി വാറ്റ് ചാരായം അത്തരം കേന്ദ്രങ്ങളിലാണ് ഉത്പാദിപ്പിക്കുന്നതും. ഒളിച്ചും പാത്തും മദ്യപിക്കേണ്ട അവസ്ഥ കേരളത്തിലുണ്ടോ? മദ്യപാനം എന്നുള്ളത് സദാചാരമൂല്ല്യങ്ങളെ മുറുകെ പിടിക്കുമ്പോഴാണ് മാരക പാപമാകുന്നത്. വൃത്തിയുള്ള മദ്യപാന ഇടങ്ങൾക്കായി വാദമുന്നയിക്കുകയാണ് സഭ ചെയ്യേണ്ടത്. എങ്ങനെ മാന്യമായി മദ്യപിക്കാമെന്ന് വിശ്വാസികളെ ശീലിപ്പിക്കുകയും വേണം.

കുടുംബം തകരുന്നുവെന്ന പേരുപറഞ്ഞാണ് കത്തോലിക്കാ സഭ ചാരായത്തിനെതിരെ പ്രതിരോധം ഉയ‍‌‍ർത്തിയത്. പിന്നീട് വിദേശ മദ്യം കള്ളുകുടി മേശകൾ കീഴടക്കിയപ്പോൾ അതിനെതിരെയായി പ്രതിരോധം. യേശുവിന്റെ രക്തത്തിന്റെ പ്രതിരൂപമാണ് വൈനെന്ന പേരിലാണ് കത്തോലിക്കാ സഭ മുന്തിരി വാറ്റി കുർബ്ബാന മധ്യേ ഉപയോ​ഗിക്കുന്നത്. പാരമ്പര്യത്തെ മുറുകെ പിടിക്കുന്ന സുറിയാനി സഭയ്ക്ക് ബലിയർപ്പണത്തിന് പഴയ മാർ​​ഗ്​ഗത്തിലേയ്ക്ക്, കപ്പയിലേയ്ക്കും തേങ്ങാവെള്ളത്തിലേയ്ക്കും തിരികെ പോയി മാതൃക കാണിക്കാവുന്നതാണ്. എന്നിട്ടും വൈദിക മേലധ്യക്ഷന്മാർ അതിനു മുതിരാത്തതെന്തുകൊണ്ടിയിരിക്കും.

കേരളത്തിൽനിന്നും യൂറോപ്പിലും മറ്റ് രാജ്യങ്ങളിലും സേവനം അനുഷ്ഠിക്കുന്ന വൈദികർ മദ്യപിക്കാറില്ലേ? കേരളത്തിൽ മാത്രമെങ്ങനെയാണ് മദ്യപാനം മാരകപാപമാകുന്നതും കുംമ്പസാര വിഷയമാകുന്നതും? മാർപ്പാപ്പ തണുപ്പുകാരണമാണ് മദ്യപിക്കുന്നതെങ്കിൽ മറ്റിടങ്ങളിലെ മദ്യപർക്കും കള്ളുകുടിക്കുന്നതിൽ അവരുടേതായ കാരണങ്ങളുണ്ട്.

വൈനുൽപ്പാദനത്തിന്റെ അളവ് വർദ്ധിപ്പിക്കാൻ അനുമതി തേടി സർക്കാരിന് നിരന്തരം അപേക്ഷ സമർപ്പിക്കുന്ന കത്തോലിക്കാ സഭ മുന്തിരി വാറ്റ് കേന്ദ്രങ്ങൾ അടച്ചുപൂട്ടാനുള്ള ധൈര്യം കാണിക്കണം. അതല്ലേ ഹീറോയിസം?

കേരളത്തിൽ വൃത്തിയുള്ള ഇടങ്ങളിലിരുന്ന് മദ്യപിക്കാനുള്ള ഇടങ്ങളില്ല. ബിവറേജ് ഔട്ട്ലെറ്റിൽനിന്നും തിടുക്കത്തിൽ വാങ്ങുന്ന മദ്യക്കുപ്പി അതേ വേ​ഗതയോ​ടെ കാലിയാക്കാനാണ് ഓരോരുത്തർക്കും തിടുക്കം. ആളൊഴിഞ്ഞ ഇടങ്ങളിൽ പോയോ കാറിലിരുന്നോ മദ്യപിക്കേണ്ട അവസ്ഥ. കാരണം കേരളത്തിലെ മദ്യപാനശീലം അങ്ങനെയാണ്. മദ്യപാനത്തിന് വൃത്തിയുള്ള ഇടങ്ങൾ വേണം. അങ്ങനെയൊരു സാഹചര്യം വന്നാൽ കേരളത്തിലെ മദ്യപാന ശീലവും അതിനനുസരിച്ച് നന്നാവാനിടയുണ്ട്.

കേരളത്തിൽ മദ്യം വിൽക്കുന്നവരിൽ പ്രധാനികളിൽ കത്തോലിക്കരാണ്. ചാരായം നിരോധിച്ച പദ്ധതി ഇവരെ സഹായിക്കാനായിരുന്നു എന്ന ആരോപണം ഇന്നും നിലനിൽക്കുന്നു. മദ്യം വിൽക്കുന്നവർ പള്ളിക്ക് വിഹിതം തരേണ്ടതില്ലെന്ന് സഭയ്ക്ക് പരസ്യമായി പ്രസ്താവനയിറക്കാനാവുമോ? മദ്യപാനികളാരും നമ്മിൽപ്പെട്ടവരല്ലെന്ന് സഭ പ്രഖ്യാപിക്കുമോ? അത്തരമൊരു നിലപാടെടുത്താൽ അതാണ് ചങ്കുറപ്പ്. അതാണ് നിലപാട്.