മന്ത്രി മണിയുടേത് നാടിനെ നാറ്റിക്കുന്ന ദുർഗന്ധം;ഖേദപ്രകടനം പോരെന്നു മഞ്ജു വാര്യര്‍

ഫെയ്‌സ്ബുക്ക് പോസ്റ്റിലാണ് മഞ്ജു മന്ത്രിയെ നിശിതമായി വിമര്‍ശിക്കുന്നത്. വെറുമൊരു ഖേദപ്രകടനത്തിനുമപ്പുറം ഇനി ഇത്തരം വാക്കുകള്‍ തന്നില്‍ നിന്ന് ഉണ്ടാകില്ലെന്ന ഉറപ്പാണ് എം എം മണിയില്‍ നിന്ന് പൊതുസമൂഹം പ്രതീക്ഷിക്കുന്നത്- മഞ്ജു പറയുന്നു

മന്ത്രി മണിയുടേത് നാടിനെ   നാറ്റിക്കുന്ന ദുർഗന്ധം;ഖേദപ്രകടനം പോരെന്നു  മഞ്ജു വാര്യര്‍

മന്ത്രി എംഎം മണിയ്‌ക്കെതിരെ മഞ്ജു വാര്യര്‍ രംഗത്ത്. തന്റെ ഫെയ്‌സ്ബുക്ക് പോസ്റ്റിലൂടെയാണ് മഞ്ജു മന്ത്രിക്കെതിരെ ആഞ്ഞടിച്ചത്. ഇന്നലെ പെമ്പിളൈ ഒരുമൈ പ്രവര്‍ത്തകരെ അപമാനിച്ചെന്ന് പറയുന്ന മണിയുടെ പ്രസ്താവനയെ നിശിതമായ ഭാഷയില്‍ വിമര്‍ശിക്കുന്നതാണ് പോസ്റ്റ്. 'സ്ത്രീകള്‍ക്കെതിരെ എന്തും പറയാം, അവരെ എന്തും ചെയ്യാം എന്ന ധൈര്യം പുരുഷസമൂഹത്തില്‍ കുറേപ്പേര്‍ക്കെങ്കിലുമുണ്ട്. ഉത്തരവാദിത്തമുള്ള മന്ത്രിയും അവരിലൊരാളായി സംസാരിക്കുമ്പോള്‍ അത് എന്ത് സന്ദേശമാണ് സമൂഹത്തിന് കൊടുക്കുന്നതെന്ന് ചിന്തിക്കേണ്ടിയിരിക്കുന്നു. മൂന്നാറിലെ പെമ്പിളൈ ഒരുമൈ പ്രവര്‍ത്തകര്‍ക്കെതിരായ മന്ത്രി എം.എം.മണിയുടെ പ്രസ്താവനയില്‍ നിന്ന് വമിക്കുന്ന ദുര്‍ഗന്ധം നാടിനെ മുഴുവനുമാണ് നാണം കെടുത്തുന്നത്' എന്നാണ് പോസ്റ്റ് തുടങ്ങുന്നത്. '


രാജ്യം ശ്രദ്ധിക്കുകയും ഒരുപാട് പേര്‍ ഒപ്പം നില്‍ക്കുകയും ചെയ്ത പോരാട്ടമായിരുന്നു പെമ്പിളൈ ഒരുമൈയുടേത്. അതിനെ ഏറ്റവും തരം താഴ്ന്ന രീതിയില്‍ പരിഹസിച്ചതിലൂടെയും പ്രവര്‍ത്തകരെ സ്വഭാവഹത്യ നടത്തിയതിലൂടെയും മന്ത്രി അപമാനിച്ചത് ആത്മാഭിമാനത്തോടെ നിവര്‍ന്നു നില്കാന്‍ ശ്രമിക്കുന്ന എല്ലാ സ്ത്രീകളേയുമാണ്. ഒരുപാട് ജനകീയ പോരാട്ടങ്ങള്‍ക്ക് നേതൃത്വം കൊടുക്കുകയും എന്നും ജനങ്ങള്‍ക്കൊപ്പം നില്‍ക്കുകയും ചെയ്യുന്ന ഒരു പ്രസ്ഥാനത്തിന്റെ പ്രതിനിധിയായ അദ്ദേഹത്തിന് എങ്ങനെ ഇത്തരത്തില്‍ പറയാന്‍ കഴിയുന്നു എന്നത് അത്ഭുതപ്പെടുത്തുന്നു' എന്ന് മഞ്ജു

പറയുന്നു. 'ആര്‍ക്കും നാവുകൊണ്ടു പോലും അപമാനിക്കാനുള്ള വസ്തുവല്ല സ്ത്രീ. അത് സമൂഹത്തോട് വിളിച്ചു പറയേണ്ട ബാധ്യതയുളളയാളാണ് ഒരു മന്ത്രി. വെറുമൊരു ഖേദപ്രകടനത്തിനുമപ്പുറം ഇനി ഇത്തരം വാക്കുകള്‍ തന്നില്‍ നിന്ന് ഉണ്ടാകില്ലെന്ന ഉറപ്പാണ് എം.എം.മണിയില്‍ നിന്ന് പൊതുസമൂഹം പ്രതീക്ഷിക്കുന്നത്. ആത്മാഭിമാനത്തിന്റെ വീണ്ടെടുപ്പിനായുള്ള സമരത്തില്‍ പെമ്പിളൈ ഒരുമൈയ്‌ക്കൊപ്പം എന്നു പറഞ്ഞാണ് പോസ്റ്റ് അവസാനിക്കുന്നത്. ഒരു മണിക്കൂറിനുള്ളില്‍ 252 ഷെയറുകളാണ് പോസ്റ്റിന് ലഭിച്ചിട്ടുള്ളത്.


Read More >>