മലപ്പുറത്ത് ബോംബു പൊട്ടിക്കുന്നത് അഹിന്ദുക്കളും അമുസ്ലിങ്ങളുമാണ്

എന്തായാലും, കൊള്ളാം, ആന്റി ടെററിസ്റ്റ് സ്ക്വാഡും പിണറായി സഖാവിന്റെ സ്റ്റേറ്റ് പൊലീസും അൽ-ഉമ്മയും ഹിന്ദുത്വ ഭീകരരും ചേർന്നൊരുക്കാൻ പോകുന്ന വൻ ഓപ്പറേഷന്റെ തിര നാടകം! ഇനി 'കൊന്ന ഭീമന്മാരെ' തേടിയുള്ള വേട്ടയുടെ നാളുകളാവുമല്ലോ. അതിൽ അർമാദിക്കാൻ കേരള ഗ്യാലറി റെഡിയാണെന്നറിയാം.

മലപ്പുറത്ത് ബോംബു പൊട്ടിക്കുന്നത് അഹിന്ദുക്കളും അമുസ്ലിങ്ങളുമാണ്

ശത്രുക്കളുമായി അങ്കംവെട്ടുന്നതിനിടെ കയ്യിൽക്കിട്ടിയ മാരകായുധം തിരിച്ചുംമറിച്ചും നോക്കി റാംജിറാവു സ്പീക്കിങ്ങിൽ ഇന്നസെന്റ് പറയുന്ന പ്രസിദ്ധമായ ഡയലോഗില്ലേ - 'ഒരു തോക്കു കിട്ടിയിട്ടുണ്ട്.. '

മലപ്പുറത്തെ ബോംബുസ്‌ഫോടനവാർത്ത വായിക്കുന്നവർ ആ തമാശ ഓർമ്മവന്നാലും ചിരിച്ചുപോവരുത്. കാരണം, ബോംബു പൊട്ടിയതന്വേഷിക്കാൻ എൻഐഎ വരുന്നുണ്ട്! സ്ഫോടന വാർത്ത കേട്ടാൽ ചിരിക്കുന്നവർക്ക് ഭീകരബന്ധമുണ്ടാവുമെന്ന് അവർക്ക് ഉറപ്പാണ്!


ബോംബുവെക്കാൻ മെനക്കെടുന്നവർക്ക് ഒരു കെട്ടിട സമുച്ചയമാകെ തകർത്ത് മിനിമം ഒരു പത്തമ്പതു കുടുംബങ്ങളെയെങ്കിലും വഴിയാധാരമാക്കാനും, ഒരു കാറിന്റെ പിൻചില്ലും ടയറും പൊട്ടിക്കാനും ഒരേ അധ്വാനമാണെന്ന് ആർക്കുമറിയാം. എന്നിട്ടും തീരുമാനിച്ചത് രണ്ടാമത്തേതാണ്! എൻഐഎക്കാർക്ക് കൊണ്ടുപോയി പരിശോധിക്കാൻ സ്ഫോടനസ്ഥലത്ത് ബാക്കിവച്ചിരിക്കുന്നത് അതിലും ഉഗ്രൻ തെളിവുകളാണ്!

ഒന്ന്, യുപിയിൽ പോത്തിറച്ചി കഴിച്ചതിന് കൊല്ലപ്പെട്ട മുഹമ്മദ് അഖ് ലാക്കിനു വേണ്ടിയുള്ള ഒരു വിലാപക്കുറിപ്പ്. അതും ഇംഗ്ലീഷിൽ! ഹിന്ദുത്വക്കാരോട് പ്രതികാരം ചെയ്യുമത്രേ! (ഇംഗ്ലീഷിലാക്കിയത് എൻഐഎക്കാരുടെ സൗകര്യത്തിനാവും. മലയാളത്തിൽ പോത്തിറച്ചി എന്നെഴുതിയാൽ 'ഗോ മാതാവിന്റെ ഇറച്ചി' എന്ന രാജ്യദ്രോഹപരമായ അർത്ഥം കിട്ടില്ലല്ലോ!)

രണ്ട്, ഒരു പെട്ടിയിൽ ലഘുലേഖ. പേരും വിലാസവുമടക്കം. ബേസ് മൂവ്മെന്റാണത്രേ. അൽ-ഉമ്മയുടെ പുതിയ പേരാണത്രെ. അൽ-ഉമ്മ ഇങ്ങനൊരു പുതിയ പേരിലാണിപ്പോഴെന്ന് അറിയാത്തവർക്കായി 'ബേസ് മൂവ്മെന്റ് എലിയാസ് അൽ-ഉമ്മ' എന്നായിരിക്കും എഴുതിയിട്ടുണ്ടാവുക!

ബിൻ ലാദന്റെ ചിത്രവുമുണ്ട് പെട്ടിയിൽ. ബോംബു പൊട്ടി ചുറ്റുഭാഗവും താറുമാറായാലും ബിൻലാദന്റെ ചിത്രവും അൽ-ഉമ്മയുടെ പേരും കാണാതെ പോവരുതല്ലോ. അതുകൊണ്ടവ കാർഡ് ബോർഡ് പെട്ടിയിലാക്കി ഭദ്രമാക്കിയാണ് സ്ഫോടനസ്ഥലത്ത് വച്ചിരിക്കുന്നത്!

മൂന്നാമത്തെ തെളിവാണ് അതിനിഗൂഢം! ഒരു പെൻഡ്രൈവ്! അതിൽ ഹിറ്റ് ലിസ്റ്റാവും മിക്കവാറും. കെ.സുരേന്ദ്രന്റെ വീടിന്റെയും പരിസരത്തിന്റെയും റൂട്ട് മാപ്പും അദ്ദേഹത്തിന്റെ നീക്കങ്ങൾ ട്രെയ്സ് ചെയ്യാൻ ഇറക്കുമതിചെയ്ത ഡിജിറ്റൽ ഡി വൈസുകളുടെ പാസ് വേഡും മറ്റുമായിരിക്കും അതിൽ ഉണ്ടാവുക!

എന്തൊരു പ്ലാനിങ്ങ്! എന്തൊരു രഹസ്യാത്മകത! അൽ-ഉമ്മയെ റബ്ബിൽ ആലമീൻ കാക്കട്ടെ!

ആരെയാണീ പൊട്ടീസാക്കുന്നത്?

മലയാളിക്കു വേണ്ടതെന്തോ, അത് അക്രമികളിൽ നിന്ന് / സംഭവസ്ഥലത്തുനിന്ന് കണ്ടെടുക്കുന്നതിൽ നമ്മുടെ അന്വേഷകർക്ക് എപ്പോഴും ഭാഗ്യമുണ്ടാവാറുണ്ട്. പണ്ട് മഅദനിയുടെ വീട് റെയിഡ് നടത്തിയപ്പോൾ അങ്ങനെ ഗർഭനിരോധന ഉറ കണ്ടെത്തിയെന്ന് മാധ്യമങ്ങൾ ഒന്നൊഴിയാതെ റിപ്പോർട്ടു ചെയ്തിരുന്നു. നിരോധ് കൊണ്ടു ബോംബുണ്ടാക്കുമോ എന്നതുകൊണ്ടല്ല, ഗർഭനിരോധന ഉറയിൽ നമുക്കെപ്പോഴും പല ഭീകരവിരുദ്ധ രതിഭാവനകളും ഉണരുമല്ലോ. ബിൻ ലാദന്റെ ചിത്രം കാണുമ്പോഴെന്നപോലെ!

എന്തായാലും, കൊള്ളാം, ആന്റി ടെററിസ്റ്റ് സ്ക്വാഡും പിണറായി സഖാവിന്റെ സ്റ്റേറ്റ് പൊലീസും അൽ-ഉമ്മയും ഹിന്ദുത്വ ഭീകരരും ചേർന്നൊരുക്കാൻ പോകുന്ന വൻ ഓപ്പറേഷന്റെ തിര നാടകം! ഇനി 'കൊന്ന ഭീമന്മാരെ' തേടിയുള്ള വേട്ടയുടെ നാളുകളാവുമല്ലോ. അതിൽ അർമാദിക്കാൻ കേരള ഗ്യാലറി റെഡിയാണെന്നറിയാം.

അതിനിടയിൽ ആരു വിചാരിച്ചാലും മണ്ണിലാഴാതെ കിടക്കും മലപ്പുറത്തിന്റെ ചില ഓർമ്മകൾ. അമുസ്ലിങ്ങളും അഹിന്ദുക്കളും മാറിമാറി വരുന്ന ഭരണ സംവിധാനങ്ങളും ചേർന്ന് കുട്ടിച്ചോറാക്കുന്ന മലപ്പുറത്തിന്റെ ശാന്തജീവിത ചരിത്രം.

ആരാണ് അഹിന്ദു? ആരാണ് അമുസ്ലിം?

അമുസ്ലിമെന്നാൽ, ഇസ്ലാമെന്തെന്ന് തിരിയാത്തവർ. ഹൃദയങ്ങൾക്കും ചെവികൾക്കും അള്ളാഹു മുദ്രവച്ചവർ. 'ഞങ്ങൾ അള്ളാഹുവിലും അന്ത്യദിനത്തിലും വിശ്വസിക്കുന്നുവെന്ന് പറയുന്ന ചിലരുണ്ട്. യഥാർത്ഥത്തിൽ അവർ വിശ്വാസികളേയല്ല... അവർ അള്ളാഹുവിനെയും വിശ്വാസികളെയും വഞ്ചിക്കാൻ ശ്രമിക്കുന്നു..' (വി.ഖുർആൻ/ അൽ ബഖ്റാ). ഇവരെ കാത്തിരിക്കുന്നത് കഠിനശിക്ഷയാണെന്ന് അള്ളാഹുവിന്റെ പ്രവാചകൻ സ്പഷ്ടമായി പറയുന്ന കൂട്ടർ. ഖുർആൻ സുവ്യക്തമായും കള്ളന്മാരെന്ന് വിശേഷിപ്പിക്കുന്ന കപടവിശ്വാസികൾ.

അഹിന്ദുക്കളെന്നാൽ, ഹിന്ദുമതം എൽ.കെ.അദ്വാനി രഥയാത്ര നടത്തി സ്ഥാപിച്ചതാണെന്ന് വിശ്വസിക്കുന്ന പുത്തൻകൂറ്റ് ഹിന്ദുക്കൾ. ശ്രീരാമകൃഷ്ണ പരമഹംസരെന്നു പറയുമ്പോൾ സ്പീക്കർ ശ്രീരാമകൃഷ്ണനെന്നതിനപ്പുറം അറിയാൻ തല തെളിഞ്ഞിട്ടില്ലാത്ത ദുരാത്മാക്കൾ. വിവേകാനന്ദസാഹിത്യ സർവ്വസ്വം ആറ്റിക്കുറുക്കിയതാണ് കുമ്മനം രാജശേഖരൻ നായർ പറയുന്നതെന്ന് വിശ്വസിക്കുന്നവർ. കഠിനയാതനകൾ നിറഞ്ഞ കൃമി -കീട ജന്മങ്ങൾ പലതു താണ്ടിയാലും മനുഷ്യജന്മമെന്ന അനുഗ്രഹത്തിലേക്ക് നടന്നെത്തുമെന്ന് ഒരുറപ്പുമില്ലാത്തവർ.

എൺപതുകൾ മുതൽ ഈ രണ്ടു കൂട്ടരും സ്റ്റേറ്റും ചേർന്നൊരുക്കുന്ന രക്തക്കളത്തെയാണ് മലപ്പുറം ജനത അതിജീവിച്ചുകൊണ്ടിരിക്കുന്നത്. മലപ്പുറം ജനതയെന്നാൽ പക്ഷെ, ഈ കപട ദീനികളായ അമുസ്ലിംകളുടെതോ ഹൈന്ദവതയെന്തെന്നറിയാത്ത ഹിന്ദുത്വക്കാരുടേതോ അല്ല.

ഏത് 'അൽ-ഉമ്മാ'ന്റെ മക്കൾക്കാണിപ്പോൾ ഭീകരരായിക്കളയാൻ വാസന?

ഏറനാടും പൊന്നാനിയുമാണ് മലപ്പുറം മാപ്പിളമാരുടെ ഹൃദയഭൂമികൾ. സൂഫികളായ തങ്ങമ്മാരുടെതാണ് ഇന്നാടിന്റെ മാപ്പിള പാരമ്പര്യം. അവരുടെ സാത്വികരായ പിന്മുറക്കാർ പോർട്ടുഗീസുകാർ തൊട്ട് ബ്രിട്ടീഷുകാർ വരെയുള്ള അധിനിവേശികളെ ചെറുത്തത് ഇസ്ലാമിന്റെ പതാക ഉയർത്തിപ്പിടിച്ചാണ്.

തൊള്ളായിരത്തെൺപതുകൾ വരേക്കും ഇസ്ലാമിന്റെ ഈ സൂഫീ സ്വത്വത്തെ പിച്ചാത്തി പിടിപ്പിക്കാൻ നടന്ന ശ്രമങ്ങളൊന്നും പച്ച തൊട്ടിട്ടില്ല. ഇന്ത്യയുടെ മോചനം ഇസ്ലാമിലൂടെയെന്ന് സിമി മുദ്രാവാക്യം വിളിച്ചപ്പോൾ ഇന്ത്യയൊന്നാകെ അതിന് പ്രതിദ്ധ്വനിയുണ്ടായെങ്കിലും മലപ്പുറത്തെ ചുമരുകളൊന്നും ആ മുദ്രാവാക്യമെഴുതാൻ ഒഴിഞ്ഞുകിട്ടിയിട്ടില്ല.

ബാബരി പളളി പൊളിച്ചപ്പോഴും മലപ്പുറം തീക്കൊള്ളിയെടുത്തിട്ടില്ല. 'ഞമ്മളെക്കൊണ്ടാണ് മലപ്പുറം അന്ന് ശാന്തരായതെ'ന്ന് മേനി പറയുന്ന മുസ്ലിം ലീഗുകാർ പലയിടത്തും തീക്കൊള്ളിയെടുപ്പിക്കാൻ നോക്കിയിട്ടും നടന്നിട്ടില്ലെന്നതിന് അനുഭവസാക്ഷ്യങ്ങളുമുണ്ട്.

അക്കാലംവരെ യത്നിച്ചിട്ടും കാൽക്കാശിനു പിന്തുണ കിട്ടാതെ പോയ 'മത പരിഷ്കരണവാദ' പ്രസ്ഥാനക്കാർക്ക് പിൽക്കാലത്തുണ്ടായ പരിവേഷങ്ങളും വളർച്ചയും ചേർത്തു വേണം മലപ്പുറം അസ്വസ്ഥമായിത്തുടങ്ങിയതിന്റെ കഥകൾ അന്വേഷിക്കാൻ. മദ്രസ്സയും മൊല്ലാക്കയും നോമ്പുകാലത്ത് ചായപ്പീട്യ തുറക്കാതിരിക്കലും വെള്ളിയാഴ്ചത്തെ സ്കൂളവധിയും മദ്രസ്സയിലെ കിത്താബ് ഹിന്ദുക്കുട്ടികൾ തൊടാതെ പാത്തുവെക്കലും അതിനുമുമ്പുമുണ്ട്. മാപ്പിളക്കുട്ട്യോളെക്കൊണ്ടൊന് നും ബോംബുപോയിട്ട് അടക്കാക്കത്തിപോലും വാപ്പാര് പിടിപ്പിച്ചിട്ടില്ല. പകരം, പത്താം ക്ലാസ് തികയും മുമ്പ് മീശ വടിപ്പിച്ച് വയസ്സ് പതിനെട്ടാക്കിച്ച്, വീടരെ കണ്ണീരിലാഴ്ത്തി, ഗൾഫ് നാട്ടിലേക്ക് വിട്ടിട്ടേയുള്ളൂ മലപ്പുറത്തെ മാപ്പിളമാർ. അതിന്റെ ഊക്കിലാണിപ്പോഴും നന്ദികെട്ട കേരളം പുലരുന്നതെന്നും ഓർക്കാം.

അക്കഥ മാറിയത് രണ്ട് മറികളിലായാണ്. ഒന്ന്, ബാബരിപ്പള്ളി പൊളിക്കുന്നതിനും മുമ്പേ ഹിന്ദുത്വക്കാർ കെട്ടഴിച്ചുവിട്ട കെട്ടുകഥകളുടെ കുത്തൊഴുക്കും പിന്നെ നടന്ന പള്ളി പൊളിക്കലും. അതിനെ നെഞ്ചമർത്തിപ്പിടിച്ചാണെങ്കിലും മലപ്പുറത്തെ മാപ്ളാര് മറികടന്നു. പക്ഷെ, ആ നെഞ്ച് കലക്കിയതും അവരുടെ മക്കളുടെ തലയിൽ 'മുസ്ലിം ഐഡന്റിറ്റി'യുടെ തീ കോരിയിട്ടതും വിഖ്യാതരായ സലഫി പ്രസ്ഥാനങ്ങളാണ്. അവർ സ്വയവും, ഇടത്- ലിബറൽ ടീമുകളെക്കൊണ്ടും 'പുരോഗമനവാദികളെ'ന്നു പേരുണ്ടാക്കുകയും ചെയ്തു.

ഫ്രഞ്ച് മുസ്ലിം സ്റ്റൈലിൽ മഫ്തയും, ബ്രിട്ടീഷ് സ്റ്റൈലിൽ ടൈയും ഷൂസും, വള്ളുവനാടൻ നായമ്മാരുടെ കൃത്രിമ മലയാളവും ശീലിപ്പിച്ച് പുത്ത നിസ്ലാംകുട്ടികളെ പ്രൊഡ്യൂസ് ചെയ്ത ഇംഗ്ലീഷ് സ്കൂൾ ഫാക്ടറികൾ തുടങ്ങിയത് ജമായത്തുകാരാണെന്നതാണ് അൽഭുതം! കഠിന ജമായത്ത് വിരോധികളായ ഇരുവിഭാഗം സുന്നികളും ഇവരെ പിന്തുടർന്നുവെന്നത് അതിലും ആശ്ചര്യം! ദീനിലെ വ്യത്യാസം ഉറപ്പിക്കാൻ ഒരു വട്ടത്തൊപ്പികൂടി ഫിറ്റ് ചെയ്യിച്ചു 'സുന്നി-ഇംഗ്ലീഷ്' സ്കൂളുകാർ.

രാവിലെ ഇടിവണ്ടിയിൽക്കയറ്റി തിരിച്ചെത്തിച്ച്, ഭൂമിമലയാളം തൊടാതെ വളരുന്ന കുഞ്ഞുങ്ങൾക്ക് തലയിൽ ഐടിയും ബിസിനസ് മാനേജ്മെന്റും പോലുള്ള ഗ്ലാമറസ് തൊഴിൽ ലക്ഷ്യങ്ങൾ. പഠിച്ചു തീരുമ്പോഴറിയുന്നു അവർ രാജ്യം ഹിന്ദുത്വക്കാരുടെതാണെന്നും തങ്ങളിവിടെ വിവേചന ഭീകരതകളുടെ ഇരകളാണെന്നും.

സാമൂഹ്യ യാഥാർത്ഥ്വങ്ങളെ മനസ്സ് അള്ളാന്റടുത്തുറപ്പിച്ച് നേരിടാനുള്ള സൂഫി വിദ്യകളൊന്നും അവരുടെ ഇംഗ്ലീഷ് മദ്രസ്സകളിൽ പഠിപ്പിച്ചിട്ടില്ല! തമ്മിൽ ശത്രുക്കളായ ബ്രിട്ടീഷുകാരെയും ടിപ്പുവിനെയും സ്വന്തം ജനതക്ക് ഒരുപോലെ ഉപയുക്തരാക്കാൻ കഴിഞ്ഞ കൊണ്ടോട്ടിത്തങ്ങളെ അവർക്കറിയില്ല. പൊന്നാനി മഖ്ദൂമുമാരുടെ ആത്മവിദ്യാ പാരമ്പര്യമോ, ചെറുമക്കളും മനമുരുകി വിളിക്കുന്ന മമ്പുറത്തെ തങ്ങമ്മാരെയോ, വെളിയങ്കോട് ഖാസിയെയോ അവർ 'ഇസ്ലാമിക് സിലബസി'ൽ പഠിച്ചിട്ടില്ല. വാരിയംകുന്നത്ത് നായകനായ ഐ.വി.ശശിപ്പടം പോലും കണ്ടിട്ടില്ല. പൂക്കോട്ടൂർ മണ്ണിന്റെ ചോരച്ചുവപ്പ് 'മാപ്പിള കലാപ'മെന്ന ദുഷ്ടമായ വിളിയായല്ലാതെ ജനങ്ങളുടെ ഒരുമയുടെ ചരിത്രമായി അവർ അറിഞ്ഞിട്ടില്ല.

പകരം 'മതപരിഷ്കരണ'ക്കാർ അവർക്കെത്തിച്ച പാഠപുസ്തകങ്ങളാണല്ലോ പീസ് സ്കൂളിൽ കണ്ടത്. അവയ്ക്ക് മാതൃക മോദിജിയുടെ ഗുജറാത്തിലെ സ്കൂൾ ബുക്കുകളാണെന്നു പോലും പരിഷ്കരണക്കാർ ഈ കുട്ടികളെ അറിയിച്ചിട്ടില്ല.

അപ്പോഴവർക്ക് ബിൻ ലാദനെ പ്രിയപ്പെടാതെ വഴിയില്ല. അവർ ഇസ്ലാമിസ്റ്റുകളാൽ കുരുക്കപ്പെട്ട തലമുറയാണ്. ഇന്റലിജൻസുകാർ കൊണ്ടുവച്ച പെട്ടിയിൽനിന്നായാൽപ്പോലും ബിൻ ലാദന്റെ ചിത്രം കണ്ടാൽ അവർക്ക് 'ഇസ്ലാമിക സ്വത്വബോധം' തിളച്ചെന്നു വരും. മാപ്പിളസ്വത്വം അപഹരിക്കപ്പെട്ട കുഞ്ഞുകിടാങ്ങൾ എൻഐഎക്കാരാൽ വേട്ടയാടപ്പെടപ്പെടുന്നത് ഈ ഇസ്ലാമിസ്റ്റ് രാഷ്ട്രീയക്കെണിയിൽ പെട്ടതുകൊണ്ടുകൂടിയാണ്. വേറെ എത്ര കാരണങ്ങൾകൂടി നിരത്തപ്പെട്ടാലും.

മലപ്പുറത്തെ വളയുന്ന അമുസ്ലിം-അഹിന്ദു-സ്റ്റേറ്റ് സഖ്യം

പൈപ്പുബോംബും സിഗററ്റുബോംബും ആയി എന്തൊക്കെ കൊച്ചഭ്യാസങ്ങൾ നടത്തിയിട്ടും പുകയാത്ത മലപ്പുറം മണ്ണിൽ ഉലയൂതിയൂതിക്കൊണ്ടിരിക്കുകയായി രുന്നു നാനാഭാഗത്തു നിന്നും ഇക്കാലമത്രയും ഹിന്ദുത്വക്കാർ. മലപ്പുറം ജില്ലയുടെ പിറവി മുതൽ തുടങ്ങിയ അക്കളികളെ മാപ്പിളമക്കൾ  ക്ഷമയോടെ പ്രതിരോധിച്ചു. 'മുസ്ലിം അപരത്വം' അവരിൽ ജനിപ്പിക്കാനുള്ള പൊടിക്കൈകളെയൊക്കെ, ജമാഅത്തെ ഇസ്ലാമിയെ തീണ്ടാപ്പാടകലെ നിർത്തിയതുപോലെ സൗമ്യമായി, അവർ കൈകാര്യം ചെയ്തു.

ബാബരിപ്പള്ളി തകർത്ത കാലത്ത് മതമൈത്രിക്ക് തുണ്ടുപോറലേൽക്കാതെ പിടിച്ചു നിന്ന അവരെ വളഞ്ഞിട്ടാക്രമിക്കുകയായിരുന്നു പിന്നീട് മേൽപ്പറഞ്ഞ അമുസ്ലിം-അഹിന്ദു-സ്റ്റേറ്റ് സഖ്യം.

ആദ്യം അവരുടെ സിയാറത്തുകളും നേർച്ചകളും സാമൂഹ്യാവിഷ്കാരങ്ങളുമൊക്കെ മതപരിഷ്കരണക്കാർ പരിഷ്കരിച്ചില്ലാതാക്കി. പിന്നെ, കാൽക്കീഴിലെ ഭൂമി മുഴുവൻ കുഞ്ഞാപ്പമാരുടെയും ഉസ്താക്കന്മാരുടെയും പിന്നിൽ മറഞ്ഞു നിന്നവർ അടിച്ചെടുക്കുകയോ ആപത്തിലാക്കുകയോ ചെയ്തു. അങ്ങനെ അനാഥമാക്കപ്പെട്ട സൂഫിമാപ്പിള സ്വത്വത്തെ പരിഷ്കരണക്കാർ ഹിന്ദുത്വക്കാർക്കും സിൽബന്തികൾക്കും വേട്ടയ്ക്കിട്ടു കൊടുത്തു. എല്ലാവരുമൊരുമിച്ച് അവരെയിപ്പോൾ സ്റ്റേറ്റിനും വേട്ടയ്ക്കെറിഞ്ഞു കൊടുക്കുന്നു.

ആപത്ത് കയ്യിലൊതുങ്ങാത്ത നിലയിലെത്തിയപ്പോൾ 'ഇരവാദ'വുമായി പരിഷ്കരണക്കാർ പതുങ്ങുകയാണിപ്പോൾ. ആത്മവിമർശനത്തിന്റെ ലാഞ്ഛന പോലുമില്ലാതെ. പ്രിയരേ, ഫാസിസത്തിന്റെ ക്യാമ്പുകൾ ഒഴിഞ്ഞു പോയാലും അള്ള കല്പിച്ച നരകശിക്ഷ നിങ്ങളെ ഒഴിഞ്ഞു പോവില്ല. കാരണം, വിശ്വസിച്ചേൽപ്പിച്ച 'ഇസ്ലാമിക വിദ്യാലയ'ങ്ങളിൽത്തൊട്ട് നിങ്ങൾ അറിഞ്ഞോ അറിയാതെയോ തുടങ്ങിയ വിശ്വാസവഞ്ചനകളാണ് മലപ്പുറം മാപ്പിളമാർക്ക് സ്വന്തം മക്കളുടെ നെഞ്ചിനുനേർക്ക് അമരാൻ നിൽക്കുന്ന കാഞ്ചിയിലെത്തി നിൽക്കുന്നത്. നിങ്ങൾക്കുള്ള കഠിന നരകങ്ങളിൽ അള്ള നിങ്ങൾക്ക് ഇളവു തരുമാറാകട്ടെ.

മതേതര കൗശലങ്ങൾക്കും പങ്ക്

കലക്ടറേറ്റ് വളപ്പിൽ പൊട്ടുന്ന പൊട്ടാസ് ബോംബ് കേരളത്തിന്റെയാകെ നെറ്റി ചുളിപ്പിക്കുന്നതിൽ ഹിന്ദുത്വക്കാരുടെ പങ്ക് നീട്ടിപ്പരത്തേണ്ട കാര്യമേയല്ല. അവർ അറുപതുകളിൽ തുടങ്ങി വച്ച 'മലപ്പുറം തന്ത്രം' വെടിപ്പോടെ ഇന്നും തുടരുന്നുവെന്നു കരുതിയാൽ മതി. അവർക്കുള്ള സഖ്യകക്ഷികൾ നാൾതോറും വളരുന്നെന്നു മാത്രം.

ചേകന്നൂർ സംഭവം മാത്രമൊന്നോർക്കാം. മലപ്പുറത്തെ മതഭീകരതയെപ്പറ്റി സംഘിയന്ത്രങ്ങൾ പടച്ചുകൊണ്ടേയിരിക്കുന്ന നൂറായിരം നുണക്കഥകളിൽ ഇന്നും മാർക്കറ്റുള്ള ഒന്നാണല്ലോ ചേകന്നൂർ സംഭവം. 'എന്നാലും നുമ്മടെ ഗാന്ധി' എന്നു ടി.വി.ചന്ദ്രന്റെ സിനിമയിൽ വാവിടുന്ന കള്ളുകുടിയനെപ്പോലെ, ചേകന്നൂരിനെ ഓർത്തുണരാത്ത ഒരു മൃദുഹിന്ദു സൗമ്യാത്മാവും കാണില്ല ഷഷ്ടിപൂർത്തിയായ കേരളത്തിൽ.

അന്നുമിന്നും (എന്നും!) സംഘപരിവാരമാണല്ലോ ചേകന്നൂർ സമര നായകർ. എല്ലാ മുഖ്യധാരാ രാഷ്ട്രീയക്കാരും ആ സമരത്തെ ഉള്ളിൽ പിന്തുണക്കുന്നു. പതിറ്റാണ്ടുകൾ പിന്നിടുന്നു 'ചേകന്നൂരിന് നീതി'ക്കുവേണ്ടിയുള്ള സമരം. എവിടെ എത്തി അത്? വിഖ്യാത പണ്ഡിതർ പങ്കാളികളായ 'ചേകന്നൂർ ആക്ഷൻ കൗൺസിലിന്' യുജിസി ഫണ്ടുകൂടി തരപ്പെടുത്തിക്കൊടുക്കപ്പെട്ടാ ലും അൽഭുതപ്പെടണ്ട. അവരാണല്ലോ മാധ്യമങ്ങളിൽക്കൂടി ചേകന്നൂരിന്റെ ഓർമ്മയെ സമയാസമയം ജീവിപ്പിച്ചുകൊണ്ടിരിക്കുന്നത്.

ഇവർക്ക് ലഭിച്ച നിരന്തരമാധ്യമ ശ്രദ്ധയല്ലാതെ ചേകന്നൂരിന്റെ കുടുംബത്തിന് എന്തു നീതി കിട്ടി തിരോധാനത്തിന്റെ പതിറ്റാണ്ടുകൾ പിന്നിടുമ്പോൾ? പ്രതികളെന്ന് ആരോപിക്കപ്പെടുന്നവർക്ക് ഇക്കാലയളവിൽ ബി.ജെ.പി. സർക്കാരുകൾതന്നെ ചെയ്തു കൊടുക്കുന്ന ആനുകൂല്യങ്ങൾ എത്ര കാലം രഹസ്യമാക്കി വക്കാനാവും? മലപ്പുറത്തെ അസ്വസ്ഥതകളുടെ ദീർഘവർഷങ്ങളിലേക്ക് നയിച്ചുകൊണ്ടിരിക്കുന്ന ഭൂമി ക്രയവിക്രയങ്ങളിലെല്ലാം പറ്റുള്ള 'സമുദായാചാര്യ'ന്മാരെ സൂഫികളാക്കി ജ്ഞാനസ്നാനം ചെയ്തെടുക്കുക വരെ ചെയ്തിട്ടുണ്ട് നരേന്ദ്ര മോഡി സർക്കാരെന്നത് രഹസ്യമല്ലല്ലോ, ദൗർഭാഗ്യത്തിന്.

മയ്യത്തെടുക്കാൻ തീരുമാനമായി; മലപ്പുറത്തിനിയും ബോംബ് പൊട്ടും!

മലപ്പുറം സിവിൽ സ്റ്റേഷനിൽ പൊട്ടിയ ബോംബ് സൂചനയാണെന്നാണ് മലയാള മനോരമ റിപ്പോർട്ട്. അതും കാർഡ് ബോർഡ് പെട്ടിയിൽ എഴുതി വച്ചതാണോ എന്ന് റിപ്പോർട്ടിൽ വ്യക്തമല്ല.

എന്തായാലും എൻഐഎ വരുന്നുണ്ടല്ലോ. വൈകാതെ മലപ്പുറത്തവർക്ക് ക്യാമ്പ് ഓഫീസും തുറക്കുമായിരിക്കും. അപ്പോൾപ്പിന്നെ ഭീകരപ്രവർത്തനങ്ങൾ തുടരാതെ വയ്യ. ബോംബുകൾ പൊട്ടാതെ വയ്യ.

ചുരുക്കം ഇത്രയേയുള്ളൂ. മലപ്പുറത്തിന്റെ മയ്യത്തെടുക്കാൻ തീരുമാനമായിരിക്കുന്നു. കേരളം രോമഹർഷങ്ങളോടെ പിന്തുണക്കുമെന്നുറപ്പുള്ള സ്ഥിതിക്ക് സംഘപരിവാർ അവരുടെ ചിരകാലമോഹം ഇനി അടക്കി വെക്കേണ്ടതില്ലല്ലോ.

നടക്കട്ടെ, മലയാണ്മയുടെ ഷഷ്ടിപൂർത്തി വർഷത്തിൽത്തന്നെ 'ക്രൂര മുഹമ്മദീയരുടെ നാടിന്റെ' ജനാസ നമസ്കാരം! ഇ എം.എസ്. നമ്പൂതിരിപ്പാട് കാണുന്നുണ്ടാവട്ടെ, താൻ വരച്ച മലപ്പുറം ഭൂപടം ലാക്കാക്കി, തന്റെ മതത്തിന്റെയും തന്റെ പാർട്ടിയുടെയും അറിവില്ലായ്കകൾ തണലാക്കി വിരിഞ്ഞുയരുന്ന കാളിയഫണങ്ങൾ.

Read More >>