കൂട്ടബലാത്സംഗം വെളിപ്പെടുത്തി ഭാഗ്യലക്ഷ്മി: ഇര തൃശൂര്‍ക്കാരി; ഭര്‍ത്താവിന്റെ നാലു സുഹൃത്തുക്കളും കുടുങ്ങും

ഭര്‍ത്താവിന് അസുഖമെന്ന പേരില്‍ വിളിച്ചു വരുത്തി രണ്ടുവര്‍ഷം മുന്‍പ് തൃശൂര്‍ സ്വദേശിനിയെ നാലു സുഹൃത്തുക്കള്‍ ബലാത്സംഗം ചെയ്ത സംഭവം വെളിപ്പെടുത്തി ഡബ്ബിങ്ങ് ആര്‍ട്ടിസ്റ്റ് ഭാഗ്യ ലക്ഷ്മി. കേസുമായി മുന്നോട്ട് പോകുമെന്ന് 'നാരദ'യോട് ഭാഗ്യ ലക്ഷ്മി. ആര് ബലാത്സംഗം ചെയ്തപ്പോഴാണ് കൂടുതല്‍ സുഖമുണ്ടായതെന്ന് പോലീസ് ഇരയോട്.

കൂട്ടബലാത്സംഗം വെളിപ്പെടുത്തി ഭാഗ്യലക്ഷ്മി: ഇര തൃശൂര്‍ക്കാരി; ഭര്‍ത്താവിന്റെ നാലു സുഹൃത്തുക്കളും കുടുങ്ങും

തൃശ്ശൂരിലെ വീട്ടമ്മയ്ക്ക് നേരിടേണ്ടി വന്ന കൂട്ടബലാത്സംഗവും അതിനു ശേഷം രണ്ട് വര്‍ഷമായി, വേട്ടക്കാരിൽനിന്ന് അവര്‍ നേരിടുന്ന മാനസികപീഡനവും തുറന്നു പറയുകയാണ് ഡബ്ബിംഗ് ആര്‍ട്ടിസ്റ്റായ ഭാഗ്യലക്ഷ്മി. ഭര്‍ത്താവിന്റെ സുഹൃത്തുക്കളായ നാലു പേര്‍ ചേര്‍ന്നാണ് രണ്ടു കുട്ടികളുടെ അമ്മയായ യുവതിയെ തെറ്റിദ്ധരിപ്പിച്ച് ആളൊഴിഞ്ഞ വീട്ടില്‍ കൊണ്ടു പോയി പീഡിപ്പിച്ചത്. പരാതിയുമായി പൊലീസിനെ സമീപിച്ചപ്പോള്‍ ''ഇവരില്‍ ആര് ചെയ്തപ്പോഴാണ് നിനക്ക് കൂടുതല്‍ സുഖം'' എന്നായിരുന്നു നേരിട്ട ചോദ്യം. പരാതി പിന്‍വലിച്ച് യുവതിയ്ക്കും ഭര്‍ത്താവിനും പിന്മാറേണ്ടി വന്നു. എന്നിട്ടും വെറുതെ വിടാന്‍ ആ വേട്ടക്കാര്‍ തയ്യാറായില്ല. തങ്ങള്‍ ഉപയോഗിച്ച സ്ത്രീയെ ഉപേക്ഷിക്കണമെന്നു പറഞ്ഞ് വേട്ടക്കാര്‍ ഭര്‍ത്താവിനു പിന്നാലെ ഇപ്പോഴുമുണ്ട് - പോലീസിലും രക്ഷയില്ലാതെ വന്നപ്പോള്‍ അപമാനം അങ്ങേ തലയ്‌ക്കെത്തിയപ്പോഴാണ് യുവതി ഭാഗ്യലക്ഷ്മിയുടെ അടുത്തെത്തിയത്. തൃശൂര്‍ സ്വദേശിനിയാണ് ഇരയെന്നും നീതിയ്ക്കു വേണ്ടി ഏതറ്റം വരേയും പോകാന്‍ തയ്യാറാണെന്നും ഭാഗ്യലക്ഷ്മി നാരദാന്യൂസിനോട് പറഞ്ഞു.


ചതിച്ചു വീഴ്ത്തിയ വേട്ടക്കാര്‍

ചെറിയ വരുമാനം മാത്രമുള്ള കുടുംബമാണ് യുവതിയുടേത്. അമിതമായ മദ്യപാനം മാത്രമാണ് ഭര്‍ത്താവിനുള്ള ദുശ്ശീലം. ഒരിക്കല്‍ ഭര്‍ത്താവില്ലാത്ത സമയത്ത് ഭര്‍ത്താവിന്റെ നാലു സുഹൃത്തുക്കള്‍ വീട്ടില്‍ കയറി വന്നു. ചേട്ടന് ചെറിയൊരു പ്രശ്‌നമുണ്ടെന്നും ആശുപത്രി വരെ വരണമെന്നും യുവതിയോട് പറഞ്ഞു. കുറേക്കാലമായി വീട്ടിലെ നിത്യസന്ദര്‍ശകരായിരുന്നു ആ നാലു പേര്‍. അതിലൊരാള്‍ രാഷ്ട്രീയ പാര്‍ട്ടിയിലെ ഉന്നതനുമാണ്. സംശയിക്കത്തക്ക കാരണമൊന്നുമില്ലാത്തതിനാല്‍ കാറില്‍ അവരോടൊപ്പം പുറപ്പെടുകയായിരുന്നു.

ആശുപത്രിയുടെ വഴിയും കഴിഞ്ഞ് കാറ് മറ്റെങ്ങോ പോകുന്നത് കണ്ടപ്പോഴാണ് സംശയം തോന്നിയത്. ദേഷ്യപ്പെട്ടു, ഒച്ചവച്ചു... നാലു പുരുഷന്മാരുടെ ബലിഷ്ഠമായ കൈകള്‍ക്ക് അവളുടെ നിലവിളി ഇല്ലാതാക്കാനാണോ പാട്? നഗരത്തില്‍ നിന്നു മാറി ആളൊഴിഞ്ഞ വീട്ടിലേക്ക് അവളെ വലിച്ചിഴച്ചു കൊണ്ടുപോയി മാറിമാറി പിച്ചിച്ചീന്തുകയായിരുന്നു അവര്‍ നാല് പേരും. വിജനമായ ആ പ്രദേശത്ത് അവളുടെ നിലവിളി ആരും കേട്ടില്ല...

Abuse



പീഡിപ്പിച്ചവര്‍ തന്നെ അവളെ വീട്ടില്‍ കൊണ്ടു ചെന്നാക്കുകയായിരുന്നു. 'നടന്നതെല്ലാം വീഡിയോ എടുത്തിട്ടുണ്ട്, പുറത്തു പറഞ്ഞാല്‍ അറിയാമല്ലോ' എന്ന ഭീഷണിയും. ധൈര്യമെല്ലാം ചോര്‍ന്നു പോയ അവള്‍ ആരോടും ഒന്നും പറഞ്ഞില്ല. ജീവശ്ശവം കണക്കെ ദിവസങ്ങല്‍ കഴിച്ചുകൂട്ടി. പെരുമാറ്റത്തില്‍ സംശയം തോന്നിയ ഭര്‍ത്താവിനോട് കാര്യങ്ങള്‍ തുറന്നു പറഞ്ഞപ്പോള്‍ മാസം മൂന്നു കഴിഞ്ഞിരുന്നു.

'സുഖ'മന്വേഷിക്കുന്ന പൊലീസ്

ഭര്‍ത്താവിന്റെ നിര്‍ബന്ധത്തിലാണ് അവള്‍ പൊലീസില്‍ പരാതിപ്പെടാന്‍ തയ്യാറായത്. നാല് പേരേയും സ്റ്റേഷനില്‍ വിളിപ്പിച്ച് അവളുടെ മുമ്പില്‍ നിര്‍ത്തി ഇവരാണോ പരാതിയില്‍ പറഞ്ഞവരെന്ന് പൊലീസ് ചോദിച്ചു. അതെയെന്ന് പറഞ്ഞ അവളോട് അടുത്തതായി പൊലീസ് ഉദ്യോഗസ്ഥന്‍ ചിരിച്ചുകൊണ്ട് പച്ചയ്ക്ക് ചോദിച്ചതിങ്ങനെ. '' ഇവരില്‍ ആര് ചെയ്തപ്പോഴാണ് നിനക്ക് നല്ല സുഖം തോന്നിയത്? '' തന്റെ മുമ്പിലിരുന്ന് പറഞ്ഞപ്പോള്‍ ആ യുവതിയും കേട്ട താനും ഉറക്കെ നിലവിളിച്ചു പോയെന്ന് ഭാഗ്യലക്ഷ്മി പറയുന്നു.

''അവരത് ചോദിച്ചപ്പോള്‍ ബലാത്സംഗം ചെയ്യപ്പെട്ടപ്പോള്‍ അനുഭവിച്ചതിനേക്കാള്‍ വേദനിച്ചു, അതിലേറെ ഉച്ചത്തില്‍ നിലവിളിച്ചു'' കരഞ്ഞു കൊണ്ട് അവള്‍ പറഞ്ഞു. തെളിവ് നല്‍കാന്‍ കയ്യിലൊന്നുമില്ലെന്നറിയുന്ന പൊലീസ് ഒരാഴ്ച്ചക്കാലം ചോദ്യങ്ങള്‍ കൊണ്ടുള്ള മാനസിക പീഡനമാണ് നടത്തിയത്. അത് താങ്ങാവുന്നതിന് അപ്പുറമായപ്പോള്‍, സ്ത്രീക്ക് മാനവുമില്ല, മാനഭംഗവുമില്ല, ബലാത്സംഗവുമില്ല, ഇരായ സ്ത്രീക്ക് രാജ്യത്ത് നീതി കിട്ടില്ല എന്ന് മനസ്സിലായപ്പോല്‍ താന്‍ കേസ് പിന്‍വലിച്ചെന്ന് അവള്‍ പറയുന്നു.

എന്നിടും മതിയാകാതെ അവര്‍

രണ്ട് വര്‍ഷമായി ഉറങ്ങാനോ ഭക്ഷണം കഴിക്കാനോ, കുട്ടികളുടെ കാര്യമന്വേഷിക്കാനോ തനിക്കും ഭര്‍ത്താവിനും കഴിയുന്നില്ലെന്ന് അവള്‍ പറയുന്നു. ''പരസ്പരം സ്‌നേഹമുള്ളതു കൊണ്ടും മക്കളെയോര്‍ത്തുമാണ് ആത്മഹത്യ ചെയ്യാതെ ജീവിക്കുന്നത്. ഓര്‍മ്മയില്‍ നിന്ന് ബലാത്സംഗം ചെയ്യപ്പെട്ട നിമിഷം മായുന്നില്ല. കുടുംബജീവിതവുമില്ല. ദുരവസ്ഥയിലെത്തിച്ച നാലു പേരും സമൂഹത്തില്‍ മാന്യന്മാരായി ജീവിക്കുന്നു. ഞങ്ങള്‍ വേദന പുറത്തു പറയാതെ നീറി നീറി ശവങ്ങളെ പോലെ ജീവിക്കുന്നു'' - അവള്‍ പറയുന്നു.

'ഞങ്ങള്‍ നാലു പേരും ഉപയോഗിച്ച അവളോടൊപ്പം എന്തിനാടാ നീ ജീവിക്കുന്നേ, വലിച്ചെറിയെടാ' എന്നൊക്കെയാണ് ആ നരാധമന്മാർ ഇപ്പോള്‍ അവളുടെ ഭര്‍ത്താവിനോട് പറയുന്നത്. ''സഹിക്കാന്‍ വയ്യ, ജീവിക്കണോ മരിക്കണോ? സഹായത്തിന് ആരുമില്ല... എല്ലാം സഹിച്ച് ഇനിയെത്ര കാലം ജീവിക്കണമെന്നറിയില്ല''... അവള്‍ പറഞ്ഞു നിര്‍ത്തി.
ഭാഗ്യലക്ഷ്മിയുടെ വെളിപ്പെടുത്തല്‍ പൂര്‍ണ്ണമായി

“ഇത് വായിക്കുന്നവർ വിചാരിക്കും ഇതൊരു സിനിമാക്കഥയാണെന്ന്. അല്ല സുഹൃത്തുക്കളെ.വ്യക്തമായി അന്വേഷിച്ചു.സത്യമാണെന്ന് ബോധ്യപ്പെട്ട് വളരെയധികം വേദനയോടെയാണ് ഇതെഴുതുന്നത്.

രാത്രി 8മണിയായിക്കാണും, ഫോൺ ബെല്ലടിച്ചു.ഒരു സ്ത്രീ ശബ്ദം.. ഭാഗ്യലക്ഷ്മി ചേച്ചിയാണോ?പിന്നീട് ഒന്നും മിണ്ടുന്നില്ല..സ്ത്രീയുടെ കരച്ചിൽ മാത്രം. ഇങ്ങനെയുളള ഫോൺ കാളുകൾ ഈയിടെയായി എനിക്ക് ശീലമായിരിക്കുന്നു..ആരാ?എന്തിനാ കുട്ടി കരയുന്നേ?. ഞാൻ ചോദിച്ചു.എനിക്ക് ചേച്ചിയെ ഒന്ന് കാണണം.കരച്ചിലിനിടയിൽ അവൾ പറഞ്ഞു..വെറുതെ ഒരു പെൺകുട്ടി കരയില്ല, കാര്യമായ എന്തോ പ്രശ്നമുണ്ടെന്ന് തോന്നിയത്കൊണ്ട് ഞാൻ പറഞ്ഞു.അതിനെന്താ വീട്ടിലേക്ക് വരൂ..ഞാൻ അഡ്രസ്സ് പറഞ്ഞു കൊടുത്തു.

പിറ്റേ ദിവസം രാവിലെ എത്താമെന്ന് പറഞ്ഞ് ഫോൺ വെച്ചു..ഗൗരവമുളള എന്തോ പ്രശ്നമാണെന്ന് തോന്നിയത്കൊണ്ട് എല്ലാ ജോലിയും മാറ്റി വെച്ച് ഞാൻ ആ കുട്ടിയെ കാത്തിരുന്നു…രാവിലെ ഒരു പതിനൊന്ന് മണിയോടെ അവരെത്തി..ഭാര്യയും ഭർത്താവും. ഏകദേശം 35, 40 വയസ്സ് പ്രായമുളള ഒരു മെലിഞ്ഞ സ്ത്രീ .സാമാന്യം ഭേദപ്പെട്ട വീട്ടിലെയാണെന്ന് തോന്നുന്ന വസ്ത്രധാരണം..കരഞ്ഞ് വീർത്ത കണ്ണുകൾ.ചിരിക്കാൻ മറന്നുപോയ മുഖം.പറന്നു കിടക്കുന്ന തലമുടി..കസേരയിൽ ഇരുന്നപാടേ കരയാൻ തുടങ്ങി.നിസ്സഹായതയോടെ തല കുനിഞ്ഞിരിക്കുന്ന ഭർത്താവ്..ഒന്നും മിണ്ടാതെ ഞാനും..”അവൾ മാഡത്തിനോട് സംസാരിക്കട്ടെ ഞാൻ പുറത്ത് നിൽക്കാം” എന്ന് പറഞ്ഞ് അയാൾ പുറത്തിറങ്ങി വാതിലടച്ചു..

ഞാൻ കൊടുത്ത വെളളം കുടിച്ച് അവൾ പറഞ്ഞു തുടങ്ങി..അവർ ഭാര്യയും ഭർത്താവും രണ്ട് കുട്ടികളുമടങ്ങുന്ന സ്നേഹമുളള ഒരു കൊച്ചു കുടുംബം.ഭർത്താവിന് ചെറിയ വരുമാനമേ ഉളളൂ.അമിതമായ മദ്യപാനം മാത്രമായിരുന്നു അയാൾക്കുണ്ടായിരുന്ന ഒരേയൊരു ദുശ്ശീലം..വീട്ടിൽ ഭർത്താവില്ലാതിരുന്ന ഒരു ദിവസം ഭർത്താവിന്റെ നാല് സുഹൃത്തുക്കൾ അവളോട് വന്ന് പറഞ്ഞു “ചേട്ടന് ചെറിയൊരു പ്രശ്നമുണ്ട് ചേച്ചി അത്യാവശ്യമായി ഒന്ന് ആശുപത്രിവരെ വരണമെന്ന്.” കഴിഞ്ഞ കുറേ കാലങ്ങളായി ആ വീട്ടിലെ നിത്യ സന്ദര്‍ശകരായി ചേച്ചീ ചേട്ടാ എന്ന് വിളിച്ച് അവൾ വിളമ്പിക്കൊടുത്ത ഭക്ഷണവും കഴിച്ച് സഹോദര തുല്യരായി കഴിഞ്ഞ ആ നാല് പേരെ സംശയിക്കാൻ അവൾക്ക് തോന്നിയില്ല.അതിലൊരാൾ ഒരു രാഷ്ട്രീയ പാർട്ടിയിൽ ഉന്നതനുമാണ്.ആ വിശ്വാസത്തിൽ അവൾ ആ നാല് പേരോടൊപ്പം കാറിൽ പുറപ്പെട്ടു.

ആശുപത്രിയുടെ വഴിയും വിട്ട് കാറ് വെറെയെങ്ങോട്ടോ പോകുന്നത് കണ്ട് അവൾക്ക് സംശയം തോന്നി. ദേഷ്യപ്പെട്ടു ഒച്ചവെച്ചു..നാല് പുരുഷന്മാരുടെ ബലിഷ്ഠമായ കൈകൾക്ക് ഒരു സ്ത്രീയുടെ നിലവിളി ഇല്ലാതാക്കാൻ എന്ത് ബുദ്ധിമുട്ട്.? നഗരത്തിൽ നിന്ന് മാറി ആളൊഴിഞ്ഞ ഒരു വീട്ടിലേക്ക് വലിച്ചിഴച്ച് കൊണ്ടുപോയി,നാലുപേരും മാറി മാറി അവളെ പിച്ചി ചീന്തി..വിജനമായ ആ പ്രദേശത്ത് അവളുടെ നിലവിളിക്ക് ശക്തി പോരാതെ അതൊരു ദീനരോദനം മാത്രമായി..ആ രാക്ഷസന്മാർ തന്നെ അവളെ വീട്ടിൽ കൊണ്ടുവന്ന് എറിഞ്ഞിട്ട് പറഞ്ഞത്രേ,”നടന്നത് മുഴുവൻ ഞങ്ങൾ വീഡിയോ എടുത്തിട്ടുണ്ട്. നീയിത് ആരോടെങ്കിലും പറഞ്ഞാൽ…പിന്നെ അറിയാല്ലോ”.. ആരോടും ഒന്നും പറയാനുളള ധൈര്യമില്ലാതെ എന്ത് ചെയ്യണമെന്നറിയാതെ അവളൊരു ജീവശ്ശവം പോലെ നടന്നു..അവളുടെ പെരുമാറ്റത്തിലെ മാറ്റം കണ്ട് നിർബന്ധിച്ച് ചോദിച്ച ഭർത്താവിനോട് അവൾ നടന്നത് മുഴുവൻ പറഞ്ഞപ്പോഴേക്ക് മൂന്ന് മാസങ്ങൾകഴിഞ്ഞിരുന്നു..ഭർത്താവിന്റെ നിർബന്ധത്തിൽ കേസ് കൊടുത്തു. ആ നാല് പേരെയും സ്റ്റേഷനിൽ വിളിപ്പിച്ച് അവളുടെ മുൻപിൽ നിർത്തി പോലീസ് ഉദ്യോഗസ്ഥൻ ചോദിച്ചു “ഈ നാല് പേരാണോ ഈ പരാതിയിൽ പറഞ്ഞിരിക്കുന്നവർ.”?.”അതെ സാർ” എന്ന് പറഞ്ഞ അവളോട് ചിരിച്ച്കൊണ്ട് ആ ഉദ്യോഗസ്ഥൻ പച്ചക്ക് ചോദിച്ചത്രേ “ഇവരിൽ ആര് ചെയ്തപ്പോഴാണ് നിനക്ക് നല്ല സുഖം തോന്നിയത്?”ഈ വാചകം എന്റെ മുൻപിലിരുന്ന് പറയുമ്പോൾ അവൾ ഉറക്കെ നിലവിളിച്ച് കരയുകയായിരുന്നു..ഞാനും..

കരച്ചിലിനിടയിൽ അവൾ പറഞ്ഞു ” എന്റെ ചേച്ചീ “ബലാത്സംഗം ചെയ്യപ്പെട്ടപ്പോൾ അനുഭവിച്ചതിനേക്കാൾ വേദനിച്ച് നിലവിളിച്ചു ഞാനന്ന്.”കുറച്ച് വെളളം കുടിച്ചിട്ട് അവൾ തുടർന്നു..”പിന്നീടങ്ങോട്ട് പോലീസുകാരുടെ ചോദ്യങ്ങൾ കൊണ്ടുളള മാനസിക ബലാത്സംഗമായിരുന്നു ഒരാഴ്ചയോളം…സംഭവം നടന്ന് മൂന്ന് മാസങ്ങൾ കഴിഞ്ഞ് കേസ് കൊടുത്തത് കൊണ്ട് എന്റെ പക്കൽ തെളിവുകളൊന്നുമില്ല എന്ന ധൈര്യം തന്നെയാവാം അവരുടെ ഈ മാനസീക പീഡനങ്ങൾക്ക് കാരണം..അത് താങ്ങാവുന്നതിനപ്പുറമായാൽ സ്ത്രീക്ക്, മാനവുമില്ല,മാനഭംഗവുമില്ല,ബലാത്സംഗവുമില്ല.. ബലാത്സംഗത്തിനിരയായ ഒരു സ്ത്രീക്കും ഈ രാജ്യത്ത് നീതി കിട്ടില്ല എന്ന് ഉറപ്പായപ്പോൾ ഞാൻ കേസ് പിൻവലിച്ചു.

ഈ രാജ്യത്ത് നിയമം കുറ്റവാളികൾക്കൊപ്പമാണ് എന്നതിന്റെ തെളിവാണ് സൂര്യ നെല്ലി പെൺകുട്ടിയും, നിർഭയയും സൗമ്യയും.ഇനി വരാൻ പോകുന്ന ജിഷ യുടെ അവസ്ഥയും ഇത് തന്നെയാവും..
നിർഭയയും,സൗമ്യയും ജിഷയും ഒക്കെ മരിച്ചത് നന്നായി ചേച്ചി അല്ലെങ്കിൽ സൂര്യനെല്ലി പെൺകുട്ടിയെ 16 വർഷമായി ചോദ്യം ചെയ്ത് പീഡിപ്പിക്കുന്നത്പോലെ ഇവരും പീഡനമനുഭവിക്കേണ്ടി വന്നേനെ.”അവൾ ഒറ്റ ശ്വാസത്തിൽ ഇത്രയും പറഞ്ഞ് നിർത്തി..അപ്പോഴും അവളുടെ കണ്ണുനീർ നിർത്താതെ ഒഴുകുന്നുണ്ടായിരുന്നു.. എന്ത് പറഞ്ഞ് സമാധാനിപ്പിക്കും ഈ പെൺകുട്ടിയെ എന്നോർത്ത് വിങ്ങുന്ന മനസ്സുമായി നിറ കണ്ണുമായി അമ്പരന്ന് ഇരുന്നുപോയി ഞാൻ.. ഇതെന്നാണ് സംഭവിച്ചത് ?ഞാൻ ചോദിച്ചു.രണ്ട് വർഷമായി.രണ്ട് വർഷത്തിന് ശേഷം ഞാനെന്താണ് ഇനി കുട്ടിക്ക് വേണ്ടി ചെയ്യേണ്ടത്?.നിസ്സഹായാവസ്ഥയിൽ സങ്കടം അടക്കിക്കൊണ്ട് ഞാൻ ചോദിച്ചു.

“ചേച്ചീ ഈ രണ്ട് വർഷമായി എനിക്കും എന്റെ ഭർത്താവിനും ഉറങ്ങാൻ സാധിക്കുന്നില്ല ,ഭക്ഷണം കഴിക്കാൻ പറ്റുന്നില്ല,കുട്ടികളുടെ കാര്യമന്വേഷിക്കാൻ പറ്റുന്നില്ല,ബലാത്സംഗം ചെയ്യപ്പെട്ട നിമിഷം മനസ്സിൽ നിന്ന് മായാത്തത്കൊണ്ട് എനിക്കും ഭർത്താവിനും കുടുംബജിവിതം നയിക്കാൻ പറ്റുന്നില്ല..എന്നിട്ടും പരസ്പരം സ്നേഹമുളളത്കൊണ്ട് മക്കളെയോർത്ത് ആത്മഹത്യ ചെയ്യാതെ ഞങ്ങൾ ജീവിക്കുന്നു..പക്ഷേ ഞങ്ങളെ ഈ ദുരവസ്ഥയിൽ എത്തിച്ച ബലാത്സംഗ വീരന്മാരായ ആ നാല് പേരോ.. സസുഖം സമൂഹത്തിൽ മാന്യന്മാരായി വാഴുന്നു..ഞങ്ങൾ വേദന പുറത്ത് പറയാനാവാതെ ദിനം ദിനം നീറി നീറി ശവങ്ങളെപ്പോലെ ജീവിക്കുന്നു.. ഇപ്പൊ അവറ്റകൾ എന്റെ ഭർത്താവിനോട് പറയുന്നു “ഞങ്ങൾ നാലുപേരും ഉപയോഗിച്ച അവളോടൊപ്പം എന്തിനാടാ നീ ജീവിക്കുന്നേ വലിച്ചെറിയെടാ എന്ന്”.എനിക്കിത് സഹിക്കാൻ വയ്യ ചേച്ചി, ഞാൻ ജീവിക്കണോ മരിക്കണോ?..ഒരു സഹായത്തിനോ മനസ്സ് തുറന്ന് സംസാരിക്കാനോ ആശ്വസിപ്പിക്കാനോ ആരുമില്ല..ഈ മാനസിക പീഡനം സഹിച്ച് ഇനിയെത്ര കാലം ഞാനിങ്ങനെ ജീവിക്കണം…?”

നെഞ്ച്പൊട്ടിക്കരയുന്ന ഈ പെൺകുട്ടിയോട് എന്ത് പോംവഴിയാണ് ഞാൻ പറയേണ്ടത് ?..ബലാത്സംഗം ചെയ്യുന്നവൻ ആഗ്രഹിക്കുന്നതും ഇരയുടെ ജീവൻ ഇല്ലാതാവുന്നതിലൂടെ തെളിവുകൾ ഇല്ലാതാക്കുക എന്ന് തന്നെയാണ്..അത് ആത്മഹത്യയായാൽ ബലാത്സംഗം ചെയ്തവനും നിയമത്തിനും സൗകര്യമായി.കുറ്റം ചെയ്തവനെ വധിക്കേണ്ടതില്ലല്ലോ. നിയമവും സമൂഹവും നമ്മെ ഒരു തരത്തിലും സഹായിക്കില്ല എന്ന് അറിഞ്ഞുകാണ്ട് തന്നെ. ഇത് പോലെ അറിയപ്പെടാതെ പോകുന്ന, പീഡനങ്ങൾ സഹിച്ച എത്രയെത്ര പെൺകുട്ടികളും, സ്ത്രീകളും അമ്മമാരുമുണ്ടാവും ഈ രാജ്യത്ത്?.

ഹേ സ്ത്രീയേ നീ വെറുമൊരു ഭോഗവസ്തുവല്ലെന്ന് നീ തന്നെ സമൂഹത്തെ ബോദ്ധ്യപ്പെടുത്തുകയല്ലാതെ നിനക്കീ ഭൂമിയിൽ നിലനിൽപ്പില്ലെന്ന സത്യം ഇനിയെങ്കിലും നീ മനസ്സിലാക്കൂ.
നിനക്ക് സാധിക്കാത്തതായി ഒന്നുമില്ല. നിന്റെ കൈയ്യിൽ എന്നും ഒരു ആയുധമുണ്ടാവണം..ഓരോ സ്ത്രീയുടെ ഉള്ളിലും ഒരു പ്രതികാര ദുർഗ്ഗയുണ്ട് എന്ന് നമുക്ക് സ്വയം ബോദ്ധ്യപ്പെടുകയും ബോദ്ധ്യപ്പെടുത്തുകയും വേണം…സങ്കടവും രോഷവും സഹിക്കുന്നില്ല. ആ വൃത്തികെട്ടവന്മാരെ ഒന്നും ചെയ്യാൻ സാധിക്കാത്ത ഒരു രാജ്യത്ത് ജനിക്കേണ്ടി വന്നതിൽ ലജ്ജ തോന്നുന്നു.”

Read More >>