ക്ണാപ്പൻ എന്ന വാക്ക് മലയാളത്തില്‍ എത്തിയത് എങ്ങനെ?

ക്ണാപ്പൻ, യമണ്ടന്‍,കേഡി എന്നിങ്ങനെയുള്ള വാക്കുകളുടെ പിന്നാമ്പുറ കഥകള്‍

ക്ണാപ്പൻ എന്ന വാക്ക് മലയാളത്തില്‍ എത്തിയത് എങ്ങനെ?

"മലയാള ഭാഷ തൻ മാദക ഭംഗി നിൻ മലർ മന്ദഹാസമായി വിരിയുന്നു..."

ശ്രീകുമാരൻ തമ്പിയുടെ ഈ വരികളിൽ മലയാള ഭാഷയോടുള്ള പ്രണയം ആവോളമുണ്ട്. 1500 ൽ പരം വർഷങ്ങളുടെ പൈതൃകമുള്ള ഈ ശ്രേഷ്ഠ ഭാഷ സാഹിത്യ സമ്പത്തിന്റെ ഉള്ളടക്കം കൊണ്ട് ഇന്ത്യയിലെ ഇതര ഭാഷകളോടൊപ്പം, ഒരു പക്ഷെ അതിലേറെ മിന്നി തിളങ്ങി നിൽക്കുന്നു.

എന്നാൽ, നിത്യോപയോഗത്തിന് മലയാളികൾ ഉപയോഗിക്കുന്ന ചില പദങ്ങൾ മലയാളത്തിന്റെ നിഘണ്ടുവിൽ തിരഞ്ഞാൽ ഒരു പക്ഷെ കണ്ടെന്നു വരില്ല. കാരണം അവയൊക്കെ മറ്റ് ചില ഭാഷകളിലെ പദങ്ങളിൽ നിന്നു കടം വാങ്ങിയതായിരിക്കും. നമ്മുടെ നിത്യജീവിതത്തിലെ വർത്തമാനങ്ങളുടെ ഒരു ഭാഗമാകുകയും എന്നാൽ സാഹിത്യത്തിലേക്കു കടന്നിട്ടില്ലാത്തതുമായ ചില രസകരമായ വാക്കുകളുണ്ട്. അങ്ങനെ ചില പദങ്ങളെയും അവ വന്ന വഴികളെയും പരിചയപ്പെടാം.


ക്ണാപ്പൻ (Knappan)

ഈ വാക്ക് കേൾക്കുമ്പോൾ തന്നെ ചുണ്ടിൽ ഒരു ചെറുപുഞ്ചിരി എത്തിയിരിക്കും. ഒന്നിനും കൊള്ളാത്തവൻ എന്നാണ് ഈ പദം കൊണ്ട് അർത്ഥമാക്കുന്നത്. എന്നാൽ ഇത് മലബാർ ജില്ലയിൽ കല് കടറായിരുന്ന ഒരു ബ്രിട്ടീഷ് ഓഫീസറുടെ പേരാണ് എന്ന് അധികമാർക്കും അറിയില്ല. സർ ആർതർ റോലാൻഡ് നാപ്പ് (Sir Arthur Rowland Knapp) എന്ന ഇന്ത്യൻ സിവിൽ സർവ്വീസ് ഉദ്യോഗസ്ഥനാണ് ഹതഭാഗ്യനായ ആ മനുഷ്യൻ. ഭാരതത്തിനെയോ അതിന്റെ പൈതൃകത്തെയോ ശരിയായി മനസ്സിലാക്കാതിരുന്ന സർ ആർതർ നാപ്പ് എടുത്ത പല തീരുമാനങ്ങളും വിഡ്ഡിത്തങ്ങളായി ചിത്രീകരിക്കപ്പെട്ടു. കഴിവുകെട്ട അധികാരിയെന്ന തരത്തിലായിരുന്നു സർ ആർതർ നാപ്പിന്റെ പേര് അധികവും ഉപയോഗിക്കപ്പെട്ടത്. പിന്നീട് ഇദ്ദേഹം റവന്യൂ ബോർഡ് സെക്രട്ടറിയായി മദ്രാസിലേക്ക് മാറി. മലയാളിയുടെ നാവിന് അപരിചിതമായ ഒരു പേരും ആ വ്യക്തി അവശേഷിപ്പിച്ച കഴിവുകെട്ടവൻ എന്ന ഇമേജും ചേർന്നപ്പോൾ ക്ണാപ്പൻ എന്ന പുതിയ വായ്മൊഴി രൂപപ്പെട്ടതായിട്ടാണ് പറയപ്പെടുന്നത്. കാര്യങ്ങൾ എന്തായാലും, നമ്മുക്ക് ചുറ്റും ക്ണാപ്പൻമാരായി വിശേഷിപ്പിക്കപ്പെടുന്ന പല ജീവിതങ്ങളുണ്ട്.

ഓസ്സ് / ഓസിന്നു തട്ടുക- OC


ഈസ്റ്റ് ഇന്ത്യ കമ്പനിയുടെ ഔദ്യോഗിക കത്തിടപാടുകളിൽ നിന്നാണ് ഈ വാക്കിന്റെ ഉത്ഭവവും പരിണാമവും എന്ന് വിശ്വസിക്കപ്പെടുന്നു. കത്തുകളും, തപാലും മറ്റും, പോസ്റ്റൽ വഴി അയക്കുന്നതിനു കമ്പനിയ്ക്ക് സ്റ്റാമ്പ് പതിപ്പിക്കേണ്ട ആവശ്യമുണ്ടായിരുന്നില്ല. പകരമായി കമ്പനി ആവശ്യത്തിനു എന്നർത്ഥമുള്ള On Company Service- OCS എന്നു എഴുതിയാൽ മതിയായിരുന്നു. ഇപ്പോഴുള്ള സർക്കാർ തപാലുകളിൽ IGS എന്നു സീൽ ചെയ്യുന്നതു പോലെയായിരുന്നു ഈ സംവിധാനവും. കമ്പനി ഉദ്യോഗസ്ഥർ തങ്ങളുടെ സ്വകാര്യ കത്തിടപാടുകളും OCS എന്ന് ആലേഖനം ചെയ്യുവാൻ തുടങ്ങി. പോസ്റ്റൽ ഫീസ് അടയ്ക്കുന്നതിൽ നിന്നും രക്ഷപ്പെടുന്നതിനു വേണ്ടിയായിരുന്നു ഈ തന്ത്രം. സ്വീകർത്താവിന് അർഹതയില്ലാത്ത ആനുകൂല്യം കൈപ്പറ്റുകയും, തനിക്ക് സൗജന്യമായി ലഭിക്കുന്നു എന്നു അവകാശപ്പെടുകയും ചെയ്യുന്നവരെ ഓസിനു വാങ്ങാൻ നടക്കുന്നവൻ എന്നു നാടൻ വായ്ത്താരിയിൽ പരിഹസിക്കുവാൻ തുടങ്ങിയത് അങ്ങനെയാണത്രേ.

യമണ്ടൻ- Yemandan

അസാമാന്യ വലിപ്പമുള്ളതിനെയോ, അപൂർവ്വ ശക്തിയുള്ളതിനെയോ ആണ് യമണ്ടൻ എന്നു കൊണ്ട് വിവക്ഷിക്കുന്നത്. ജർമ്മനിയിലെ ഒരു യുദ്ധക്കപ്പലാണ് SMS Emden. ജർമ്മനിയിലെ ഒരു പട്ടണമായ എംഡനിനിന്റെ പേരിലാണ് ഈ കപ്പൽ നിർമ്മിച്ചിട്ടുള്ളത്. ഒന്നാം ലോകമഹായുദ്ധത്തിൽ ഉപയോഗിച്ച ഈ കപ്പൽ പിൽക്കാലത്ത് അറേബ്യൻ കടലിൽ കേരളത്തിന്റെ തീരത്തോടു ചേർന്നു മുങ്ങി പോയതായാണ് ചരിത്രം. യൂറോപ്പിലെ സൈനികരുൾപ്പടെ അനേകം ആളുകൾ ഈ ദുരന്തത്തിൽ കൊല്ലപ്പെട്ടിരുന്നു. സ്വദേശിയരുടെ ഇടയിൽ ബ്രിട്ടണിന്റെ പ്രതിച്ഛായക്ക് മങ്ങലേൽപ്പിക്കുവാനുള്ള ഗൂഢലക്ഷ്യം ഈ ദുരന്തത്തിനു പിന്നിൽ ഉണ്ടായിരുന്നുവെന്നും കരുതപ്പെടുന്നു. എമണ്ടൻ കപ്പലിൽ നിന്നും മദ്രാസിന്റെ തീരത്ത് ഘോര ബോംബ് സ്ഫോടനങ്ങൾ നടത്തിയതും ഈ കപ്പലിനു ഒരു ഭയാനക പ്രതിഛായ സൃഷ്ടിച്ചു.
ഭീകരവും ഭയാനകവുമെന്നൊക്കെ അർത്ഥം വരുന്ന പദമായ യമണ്ടൻ മാറിയത് അങ്ങനെയായിരിക്കാം.

കേഡി-KD

വില്ലൻ അല്ലെങ്കിൽ പ്രശ്നക്കാരൻ എന്നല്ലെ നമ്മൾ കേഡി എന്നു കൊണ്ട് ഉദ്ദേശിക്കുന്നത്. യാഥാർത്ഥ അർത്ഥവും ഏറെ വ്യത്യസ്തമല്ല. Known Depredator-അറിയപ്പെടുന്ന കവർച്ചക്കാരൻ എന്നാണ് ഇതിന്റെ അർത്ഥം. അറിയപ്പെടുന്ന കവർച്ചക്കാരുടെ ലിസ്റ്റ് പ്രാദേശിക പോലീസ് സ്റ്റേഷനുകളിൽ ലഭ്യമായിരിക്കണമെന്നു ഇന്ത്യൻ പീനൽ കോഡ് നിർദ്ദേശിക്കുന്നുണ്ട്. KD മാരുടെ പട്ടിക തയ്യാറാക്കുന്നത് അങ്ങനെയായിരുന്നു. ക്രമേണ ഇംഗ്ലീഷിലെ ഈ ചുരുക്കെഴുത്ത് മലയാളത്തിലെ ഒരു നവാഗത പദമായി മാറി.

കൗതുകരമായ പല പദങ്ങളുടെയും പിന്നിൽ ഇങ്ങനെ ചില കഥകളും കാണും. നാളെയുടെ ഭാഷയിൽ പുതിയ പദങ്ങളായി മാറിയേക്കാവുന്ന പല കഥകൾ ഇപ്പോഴും നടക്കുന്നുണ്ടാവും.

അറിഞ്ഞവ മനോഹരം, അറിയപ്പെടാത്തവ അതിലും മനോഹരമായിരിക്കണം!

Read More >>